Шавкат Мирзиёев 11 февраль куни Россия Федерацияси президенти администрацияси раҳбарининг ўринбосари Максим Орешкин бошчилигидаги делегацияни қабул қилди. Бу ҳақда Президент матбуот хизмати хабар берди.
Учрашув аввалида Максим Орешкин давлат раҳбарига Россия президенти Владимир Путиннинг саломи ва энг эзгу тилакларини етказди. Ўтган йил май ойида Ўзбекистонга амалга оширилган давлат ташрифи ва бошқа олий даражадаги мулоқотлар давомида эришилган келишувларни тасдиқланган "йўл харитаси"га мувофиқ амалга ошириш масалалари кўриб чиқилди.
Савдо-иқтисодий ҳамкорликнинг ривожланиш суръатини сақлаб қолиш, саноат кооперацияси ва электрон тижорат лойиҳаларини қўллаб-қувватлаш, сув хўжалиги, олий таълим ва муҳандис кадрлар тайёрлаш, сунъий интеллект, маданий алмашинув ва спорт соҳаларида амалий ҳамкорликни кенгайтириш бўйича комплекс чоралар кўришга алоҳида эътибор қаратилди.
Бундан аввал Шавкат Мирзиёев 22 январь куни Ўзбекистонда ташриф билан бўлиб турган Россия мудофаа вазири Андрей Белоусовни қабул қилганди. Унда Ўзбекистон—Россия кенг қамровли стратегик шериклик ва иттифоқчилик муносабатларини Россия президентининг 2024 йил май ойида Ўзбекистонга давлат ташрифи чоғида эришилган келишувларни амалга ошириш нуқтайи назаридан янада ривожлантириш ва мустаҳкамлаш масалалари кўриб чиқилган.
Изоҳ (0)