Беларусь президенти Александр Лукашенко Россия етакчиси Владимир Путинга Иттифоқ давлати доирасида хавфсизлик кафолатлари тўғрисидаги битимни имзолаганидан кейин мамлакатда “Орешник” ракетасини жойлаштириш илтимоси билан мурожаат қилди.
Лукашенконинг сўзларига кўра, бундай қарор Ғарб томонидан кучаяётган таҳдид шароитида ҳам Иттифоқ давлатининг, ҳам Беларусь ҳудудининг мудофаасини кучайтиради.
Россия президенти “Орешник” каби комплексларни Беларусь ҳудудида жойлаштириш мумкинлигини айтди.
“Бироқ Россиянинг ўрта масофага учувчи баллистик ракеталарини Беларусда жойлаштириш 2025 йилнинг иккинчи ярмидагина бошланиши мумкин”, дейди Путин.
Путин ва Лукашенко томонидан имзоланган хавфсизлик кафолатлари тўғрисидаги битимда “ўзаро мудофаа мажбуриятлари” белгилаб қўйилган бўлиб, келишувни амалга ошириш учун “барча мавжуд кучлар ва воситалар, жумладан Беларусь ҳудудида, Россиянинг аллақачон жойлашган тактик ядро қуролларидан фойдаланиш мумкинлиги” қайд этилган.
28 ноябрь куни Путин агар Украина ядровий қуролга эга бўлса, Россия Федерацияси барча йўқ қилиш воситаларидан фойдаланишга мажбур бўлишини айтганди. У, шунингдек, Россия Украинанинг ядро мақомига эга бўлишига йўл қўймаслигига ишора қилган.
Путин, шунингдек, мамлакат “душман” ҳаракатларига жавобан “Орешник”нинг жанговар синовларини давом эттиришини айтди.
Унинг қайд этишича, Киев бир неча бор Москва ва Санкт-Петербургдаги давлат аҳамиятига молик нишонларга ҳужум қилишга уринган. Путинга кўра, бунга жавобан Бош штаб ва Мудофаа вазирлиги Украина ҳудудидаги “Орешник” томонидан йўқ қилинадиган нишонлар рўйхатини тузмоқда.
Путиннинг сўзларига кўра, Россияда “Орешник”ка ўхшаш, фойдаланишга тайёр яна бир қанча комплекслар мавжуд. Унинг қўшимча қилишича, “Орешник”нинг кучи ядро қуролидан фойдаланиш билан таққосланади.
Изоҳ (0)