Францияда зарба бериш радиуси 1000 километргача бўлган ўрта масофали баллистик ракета ишлаб чиқиш имконияти кўриб чиқилмоқда. Лойиҳа Франция Қуролли кучлари қўмондонлиги ва бош бошқармаси ўртасида муҳокама қилинмоқда.
Ташаббус Украинадаги уруш пайтида Россия томонидан қўлланилган баллистик ракеталарнинг самарадорлигини таҳлил қилишга асосланади. Россия 21 ноябрь куни ўзининг “Орешник” баллистик ракетаси билан Днепрга зарба берганди, юқори тезлиги туфайли уни тутиб олиш деярли имконсиз.
Украинанинг ҳарбий техника ва қурол-яроғларга ихтисослашган Defense Express консалтинг компанияси ҳисоб-китобларига кўра, 1000 километрлик масофа Болтиқбўйи давлатларидан учирилганда ракеталарга Москва ва Нижний Новгороддаги нишонларни уришга имкон беради. Бундай узоқликдаги ракета эҳтимол ихчам бўлади, бу уни ишлаб чиқиш харажатларини камайтириш ва сезиларли миқдорда ишлаб чиқариш имконини беради.
Баллистик ракетага бўлган эҳтиёж
Францияда баллистик ракетани ишлаб чиқиш Европа давлатларининг ракета қуроллари бўйича умумий фаоллиги фонида муҳокама қилинмоқда. 2024 йил июль ойида Франция, Германия, Италия ва Польша 1000 дан 2000 километргача масофага учадиган янги ELSА қанотли ракетасини яратиш лойиҳасини бошлади. Кейинчалик Буюк Британия ва Швеция лойиҳага қўшилди.
АҚШ қуроллари билан Россияга зарба бериш
17 ноябрь куни АҚШ президенти Жо Байден Украинага АҚШ томонидан етказиб берилган узоқ масофали ATACMS ракеталаридан Россия ҳудудига зарба бериш учун фойдаланишга рухсат берди. Бунга Шимолий Корея ҳарбийларининг Россия армияси сафида урушда қатнашаётгани туртки бўлди.
19 ноябрь куни Украина армияси Россия ҳудудига АҚШнинг узоқ масофага учувчи ATACMS ракеталари билан зарба берди. Ҳужум Брянск вилояти Карачев шаҳридаги ҳарбий объектга қаратилган. ATACMS’нинг максимал учиш масофаси 300 километрни ташкил қилади.
21 ноябрь куни Россия илк бор Украинанинг Днепр шаҳри бўйлаб қитъалараро баллистик ракета учирди. Ҳужум Астрахан вилоятидаги полигондан амалга оширилган. Қитъалараро баллистик ракета беш минг километр масофани босиб ўтиши мумкин, аммо уларнинг баъзилари тўққиз минг километрдан ортиқ масофага мўлжалланган.
Украина Франция ракеталари билан Россияга ҳужум қила олади
Франция ташқи ишлар вазири Жан-Ноэл Барро Украина SCALP (Storm Shadow ракеталарининг французча номи) ракеталаридан Россия нишонларига ҳужум қилиш учун фойдаланиш ҳуқуқига эгалигини айтди. У Ғарб Киевни қўллаб-қувватлаш учун “қизил чизиқлар” ўрнатмаслиги кераклигини таъкидлади. Шунингдек, у Франция қўшинларини Украинага юбориш имкониятини ҳам истисно қилмади.
Изоҳ (0)