Украина президенти Владимир Зеленский The Guardian нашрига берган интервьюсида Курск вилоятида Украина қўшинлари назоратидаги ҳудудни Россия томонидан босиб олинган Украина ерларига алмаштиришга тайёр эканлигини билдирди.
Биз бир ҳудудни бошқасига алмаштирамиз, деди Зеленский ва Украина Россия томонидан босиб олинган ерларнинг қайси қисмини сўрашини ҳали аниқ билмаслигини қўшимча қилди.
Украина етакчиси барча ҳудудлар муҳим эканини, улар ўртасида ҳеч қандай устуворлик йўқлигини таъкидлади.
Шунингдек, Зеленский АҚШ президенти Дональд Трамп маъмуриятининг уруш тугаганидан сўнг Украинага хавфсизлик кафолатларини Европа давлатлари бериши кераклиги ҳақидаги ғоясини танқид қилди.
Европа америкаликларсиз хавфсизлик кафолатларини таклиф қилиши мумкин, деган фикрлар бор ва мен доимо бунга қаршиман, деди у.
Зеленскийнинг сўзларига кўра, АҚШ иштирок этмайдиган хавфсизлик кафолатлари “ҳақиқий” эмас.
Биз тинчликпарвар контингентни қўллаб-қувватлаймиз, агар у хавфсизлик кафолатининг бир қисми бўлса, лекин яна бир бор таъкидлашни истардимки, Америкасиз бунинг иложи йўқ, деди Зеленский ва Трамп билан учрашуви санаси ҳали белгиланмаганини қўшимча қилди.
Ҳарбий таҳлилчи Ян Матвеев Зеленскийнинг сўзларига изоҳ берар экан, Россия томонидан эҳтимолий қайтаришнинг энг мумкин бўлган варианти РФ қуролли кучлари томонидан эгаллаб олинган Харьков вилояти ҳудуди эканлигини таъкидлади.
Путин уни Россияга қўшиб олмади, яъни бу ерда босиб олинган ҳудуддан воз кечиш осонроқ. Бундан ташқари, эгаллаб олинган майдон Курскдагидан каттароқ бўлса-да, барибир таққосласа бўлади. Бошқа ҳар қандай вариантлар фақат айрим туманларни ўз ичига олиши мумкин, деб ёзди у Telegram каналида.
2024 йил декабрь ойида украиналик ҳарбийлар BBC News'га август ойида назоратга олинган Курск вилоятининг бир қисмини ҳеч бўлмаганда Трампнинг 2025 йил 20 январда бўлиб ўтган инаугурациясигача ушлаб туриш буюрилганини айтган эди.
Олдимизда турган асосий вазифа — Трампнинг инаугурацияси ва музокаралар бошланишигача ҳудудни максимал даражада сақлаб қолиш. Кейин уни бирор нарсага алмаштириш учун. Айнан нимага алмаштирилишини ҳеч ким билмайди, деган эди украиналик аскарлардан бири.
Изоҳ (0)