Россия Украинага иккинчи “Орешник” баллистик ракетасини учирган бўлиши мумкин, аммо у Россия ҳудудида портлади. Бу ҳақда Forbes хабар берди.
“Орешник”нинг биринчи парвозидан уч ой ўтгач, Россия 6 февраль куни баллисти ракета билан Киевни нишонга олишни режалаштирган. Ҳарбий мухбир Кирилл Сазонов таъкидлашича, “Орешник” нишонга етиб бормасдан, ишдан чиқиб, портлаган.
Россия президенти Владимир Путин “Орешник”нинг илк парвозларидан сўнг Киевдаги “қарор қабул қилиш марказлари”, жумладан, Зеленский офисини нишонга олиш билан таҳдид қилганди. Аммо иккинчи парвознинг муваффақиятсизлиги Россия учун оғир зарба бўлди.
Гарчи “Орешник”нинг иккинчи муваффақиятсиз учирилишини тасдиқлашнинг ҳозирча иложи бўлмаса-да, бу эҳтимолдан йироқ эмас, дейди журналистлар.
Хабарларга кўра, “Орешник”нинг муваффақиятсизликка учраган иккинчи парвози нафақат киевликлар ва Украина раҳбарларини бошпаналардаги таҳликали кутишдан халос этди, балки Кремль учун ҳам тескари таъсир кўрсатди. Чунки ядро каллаклари билан жиҳозланган қитъалараро баллистик ракетага ўхшаш “Орешник” ракетаси ҳарбий таъсирдан кўра кўпроқ ваҳима уйғотганди.
“Орешник” РС-26 нинг қисқароқ масофа қамровига эга модификациясидир. 2011 йилда РС-26 нинг илк синови “портлаш билан шармандали тарзда” якунланди, чунки ракета белгиланган йўналишдан четга чиқиб, Плесецк космодромидаги учириш жойидан бир неча километр нарида портлаб кетганди.
Изоҳ (0)