Россия президенти Владимир Путин Қўшма Штатларга Киевга “Орешник” тизимидаги ракета билан зарба бериб, “XXI аср юқори технологияли дуэли”ни ўтказишни таклиф этди.
19 декабрь куни матбуот анжумани билан бирлаштирилган тўғридан тўғри эфирда у Ғарб ҳаво ҳужумидан мудофаа кучларининг бундай зарбани қайтариш имконияти йўқлигини таъкидлади. Бу фикрга қўшилмайдиганларга у “технологик тажриба ўтказиш”ни таклиф қилди.
Агар Ғарб мутахассислари “Орешник” зарбасини қайтариш мумкин, деб тахмин қилса, у ҳолда улар бизга ва Ғарбда, АҚШда уларга маблағ ажратадиган шахсларга XXI асрнинг юқори технологияли дуэли сифатида муайян технологик тажриба ўтказишни таклиф этишсин. Улар, айтайлик, Киевда мағлубиятга учрайдиган бирор объектни аниқласин, у ерга ўзларининг барча ҳаво мудофааси ва ракетага қарши мудофаа кучларини жамласин, биз эса у ерга “Орешник” билан зарба берамиз. Кўрамиз, нима бўлади. Биз бундай тажрибага тайёрмиз. Бошқа томон тайёрми?, дейди Россия етакчиси.
Унинг қўшимча қилишича, “бу Россия учун ҳам, Америка томони учун ҳам фойдали бўлади”. Шунингдек, Путин “Орешник” “замонавий ва мутлақо янги қурол” эканлигини таъкидлади.
Путиннинг аниқлик киритишича, “Орешник”нинг учиш масофаси 5,5 минг километргача етади ва дунёда уни ушлаб қолувчи тизимлар мавжуд эмас. Россия президенти АҚШнинг ракетага қарши мудофаа тизимини харажатли ва самарасиз деб баҳолади.
10 декабрь куни Пентагон Ракетага қарши мудофаа агентлиги илк бор ўрта масофали баллистик ракетани муваффақиятли равишда йўқ қилганини маълум қилди. Бу воқеа Тинч океаннинг ғарбий қисмидаги Гуам ороли қирғоқларида ўтказилган синовлар пайтида содир бўлди.
“Орешник” ракета тизими
Путин 21 ноябрь куни Украинадаги объектга баллистик ракета зарбаси берилганини тасдиқлаган эди.
Унинг сўзларига кўра, синовлар муваффақиятли ўтган, армия кўзланган мақсадга эришган: “Днепропетровскда Совет иттифоқи давридан бери энг йирик ва машҳур саноат мажмуаларидан бири бўлган, бугунги кунда ракета технологиялари ва бошқа қуроллар ишлаб чиқарадиган Южмаш заводи зарар кўрган”.
“Шу пайтдан бошлаб, биз бир неча бор таъкидлаганимиздек, аввалроқ Ғарб томонидан қўзғатилган Украинадаги минтақавий можаро глобал миқёсда тус олди”, деди Россия етакчиси.
Путин ўз баёнотида Россия ракеталардан фойдаланишдан олдин Украина фуқароларини хавфли зонани тарк этиш ҳақида огоҳлантиришини таъкидлади.
“Россия тинч йўлни афзал кўради, бироқ воқеаларнинг ҳар қандай ривожига ҳам тайёр, жавоб доимо тайёр”, дея қўшимча қилган у.
Изоҳ (0)