Ижтимоий ҳимоя миллий агентлиги Россиядан яна 3 нафар бола Ўзбекистонга олиб келинганини маълум қилди.
Хабар берилишича, бугун, 11 февраль куни, Москвадаги вақтинчалик сақлаш маркази ходимлари ҳамда Ички ишлар вазирлиги кўмагида уч нафар Ўзбекистон фуқароси бўлган вояга етмаган болалар ватанга қайтарилди.
Ушбу болалардан бири онаси билан, иккинчиси эса ота-онасининг ишончномаси асосида бувиси билан, учинчиси ҳам ишончнома асосида опалари билан бирга меҳнат муҳожири сифатида Россияга келган.
Болаларнинг яқин қариндошлари мамлакат ҳудудида бўлиб туриш қоидаларини бузгани сабабли депортация қилинган, болалар эса Москва шаҳридаги Вояга етмаган ҳуқуқбузарларни вақтинча сақлаш марказига жойлаштирилган.
Ижтимоий ҳимоя миллий агентлиги, ҳудудий “Инсон” марказлари ходимлари, ижтимоий ходим ва психологлардан иборат ишчи гуруҳ томонидан болаларнинг ватанига қайтишини таъминлаш ва уларни ота-оналарига топшириш учун барча зарур ижтимоий ёрдам кўрсатиш ишлари амалга оширилди.
Қайд этилишича, хорижда оғир ҳаётий вазиятга тушиб қолган болаларни қайтариш ва уларга ижтимоий ёрдам кўрсатиш ишлари изчил давом эттирилмоқда.
Хориждан Ўзбекистонга қайтарилган болалар
Август—сентябрь ойларида хорижда ота-она қарамоғидан маҳрум бўлган 34 нафар бола Ўзбекистонга қайтарилганди. Октябрь ойида Россияда қаровсиз қолган 8 ойлик чақалоқ Ўзбекистонга, ота-онаси бағрига қайтарилди. Москвадаги вояга етмаган ҳуқуқбузарларни вақтинча сақлаш марказидан 4 нафар бола Ўзбекистонга олиб келинди. Ўша ойда Туркияда ота-онасининг қаровисиз қолиб кетган уч нафар вояга етмаган бола Ўзбекистонга қайтарилди. Ноябрда Дубайни тарк этиш тақиқланган ўзбекистонлик болага ватанга қайтишига ёрдам берилди. Декабрда Россияда ота-она қарамоғисиз қолган 15 нафар бола Ўзбекистонга қайтарилди.
Шунингдек, Россиянинг Тива Республикаси Оқ Довурак шаҳрида вақтинча ишлаётган ва ҳужжатларини йўқотган тўрт нафар Ўзбекистон фуқароси ватанга қайтарилганди.
Россиядаги элчихонанинг ўзбекистонликларга мурожаати
Ўзбекистоннинг Россиядаги элчихонаси мамлакатда ноқонуний юрган ўзбекистонликларни ҳуқуқий мақомини зудлик билан ҳал қилишга чақирди. 5 февралдан бошлаб Россия ҳудудида Россия ИИВ томонидан юритиладиган “назорат қилинадиган шахслар реестри” фаолият кўрсатишни бошлади.
Изоҳ (0)