Россия президенти Владимир Путиннинг ядровий риторикаси ва гўёки янги “Орешник” ракеталаридан намойишкорона фойдаланиш Британия Бош штабининг кескин муносабатига сабаб бўлди.
Бирлашган Қироллик мудофаа штаби бошлиғи, адмирал Тони Радакин RUSI эксперт институтида маъруза қилар экан, Россиянинг Британияга ҳар қандай ҳужуми “юқори жавоб” билан кутиб олинишини маълум қилди. Унинг сўзларига кўра, бу маълумот аллақачон Москвага етказилган ва шунинг учун Путиннинг Британия ёки НАТОга тўғридан тўғри зарба бериш эҳтимоли жуда кам.
Ядровий тўхтатувчини “кучли сақлаш ва мустаҳкамлашда давом этиш” муҳим, чунки у “Путинга энг кўп таъсир кўрсатади”, дейди Радакин.
Адмиралнинг қўшимча қилишича, Британия ҳукумати стратегик сувости кемалари ва ракеталарига катта миқдорда сармоя киритган — бу ҳақда ҳам Россияга яхши маълум. У шунга қарамай мамлакат олдида турган таҳдидларни “аниқ баҳолаш” кераклигини таъкидлади.
Радакиннинг қўшимча қилишича, дунё “учинчи атом даври”да, бу даврда ядро қуролига эга давлатлар сони ортади. Хусусан, унинг сўзларига кўра, Россия, Хитой, Эрон ва Шимолий Корея ядровий қурол захираларини кўпайтиради ёки уларни қўлга киритишга уринишда давом этади.
АҚШ Марказий разведка бошқармаси директори Уилям Бернс Путиннинг 2022 йилда Украинада ядро қуролидан фойдаланиш эҳтимолини жиддий кўриб чиққанини айтди.
Вашингтон Украина армиясининг муваффақиятли қарши ҳужуми туфайли Кремль шундай қадам ташлаши мумкинлигидан хавфсираган, дейди Бернс.
Унинг аниқлик киритишича, у Россия ташқи разведка хизмати раҳбари Сергей Наришкинни оқибатлар ҳақида шахсан огоҳлантирган.
Изоҳ (0)