Россия Украина билан урушда мағлубиятга учрамаслик учун барча воситаларни ишга солади. Бу ҳақда Россия ТИВ раҳбари Сергей Лавров Такер Карлсонга берган интервьюсида маълум қилди.
“Қўшма Штатлар ва унинг иттифоқчилари Россия учун стратегик мағлубият деб атайдиган нарсага эришишларига йўл қўймаслик учун ҳар қандай воситадан фойдаланишга тайёр эканлигимизни тушунишлари керак”, деди Россия ТИВ раҳбари.
Шу билан бирга, у Россиянинг яқинда Украинага қарши янги “Орешник” ўрта масофали гипертовушли ракетасини қўллашини Ғарб “жиддий қабул қилиши” керак бўлган “сигнал” деб атади.
Россия ТИВ раҳбари Ғарбни “Россиянинг қизил чизиқларини силжитиш мумкин” деган нотўғри фикрдан огоҳлантирди. У бу катта хато эканини қайд этган.
Шунингдек, Лавров Россия Украинадаги уруш тинч йўл билан ҳал этилиши тарафдори эканини таъкидлади.
“Путин яқинда барча мумкин бўлган сценарийларга тайёр эканимизни айтди. Лекин биз урушни музокаралар орқали тинч йўл билан ҳал қилишни афзал кўрамиз, деди”, дея қўшимча қилган у.
Лавров Россия Қўшма Штатлар билан ядровий уруш бўлишини истамаслигини ва унинг олдини олиш учун барча ҳаракатларни қилишини маълум қилди:
“Россия ҳарбий доктринасининг асосий мақсади ядро урушидан қочишдир”.
Лавров аввал ҳам бир неча бор мамлакат ҳар доим ядро уруши олдини олиш тарафдори эканини айтган эди.
“Биз ядровий урушнинг олдини олиш учун ҳамма нарса қилиниши керак деган позицияга қатъий амал қиламиз. Ядровий қурол, энг аввало, ҳар қандай ядровий урушни тўхтатиш, олдини олиш, тийиб туриш воситаси эканига аминмиз. Биз вазиятга шундай ёндашамиз”, деди Россия ТИВ раҳбари.
Вазирнинг сўзларига кўра, президент Владимир Путин бугун, 19 ноябрь куни маъқуллаган янгиланган Россия доктринасида Американинг ядро бўйича доктриналаридан фарқ қиладиган ҳеч нарса йўқ.
Янги доктринага кўра, Украинанинг Россияга қарши Ғарбнинг ядросиз ракеталарини қўллаши ядровий жавоб зарбасига олиб келиши мумкин, дея тушунтириш берди расмий Кремль.
Изоҳ (0)