Туркия ташқи ишлар вазири Хоқон Фидан Россия президенти Владимир Путиннинг ядро қуроли ҳақидаги баёнотларига жиддий қарашга чақирди.
“Россия президенти Владимир Путиннинг ядровий риторикасини фақат таҳдид сифатида кўриш ўта содда ёндашув бўлади. Қўллаш мумкин бўлган барча оддий қуроллар Украинада аллақачон қўлланилган, аммо уруш тугамаган. Бу ҳолатда ё тинчлик ўрнатилади ёки вазият бутунлай издан чиқиб кетади. Шунинг учун ҳам Путиннинг ядровий баёнотларига жиддий керак”, деган Хоқон Фидан.
28 ноябрь куни Путин агар Украина ядровий қуролга эга бўлса, Россия Федерацияси барча йўқ қилиш воситаларидан фойдаланишга мажбур бўлишини айтганди. У, шунингдек, Россия Украинанинг ядро мақомига эга бўлишига йўл қўймаслигига ишора қилган.
Путин, шунингдек, мамлакат “душман” ҳаракатларига жавобан “Орешник”нинг жанговар синовларини давом эттиришини айтди.
Унинг қайд этишича, Киев бир неча бор Москва ва Санкт-Петербургдаги давлат аҳамиятига молик нишонларга ҳужум қилишга уринган. Путинга кўра, бунга жавобан Бош штаб ва Мудофаа вазирлиги Украина ҳудудидаги “Орешник” томонидан йўқ қилинадиган нишонлар рўйхатини тузмоқда.
Путиннинг сўзларига кўра, Россияда “Орешник”ка ўхшаш, фойдаланишга тайёр яна бир қанча комплекслар мавжуд. Унинг қўшимча қилишича, “Орешник”нинг кучи ядро қуролидан фойдаланиш билан таққосланади.
Изоҳ (0)