АҚШ илк бор ҳаво базасидаги ўрта масофали баллистик ракетани тутиб олишга муваффақ бўлди, дея хабар бермоқда Deutsche Welle.
“Американинг Ракеталарга қарши мудофаа агентлиги Тинч океаннинг ғарбий қисмидаги Гуам қирғоғи яқинида муваффақиятли синовлар ўтказди, бу оролнинг мудофаа қобилиятида муҳим босқич бўлди”, дейди АҚШ Мудофаа вазирлиги.
Синов пайтида янги АN/TPY-6 радари ва вертикал учириш тизими билан интеграция қилинган Aegis Гуам тизими RTX Cоrp томонидан ишлаб чиқарилган Standard Missile-3 Block IIА ракетасини учирди. Пентагонга кўра, ушбу ракета Андерсен авиабазаси қирғоқлари яқинида ҳаводан учирилган ўрта масофали баллистик ракетани муваффақиятли ушлаб олган.
АҚШ Гуам оролининг ҳаво мудофаасини кучайтирмоқда
АҚШ Ракеталарга қарши мудофаа агентлиги директори Ҳит Коллинс синовларни “улкан гуруҳ ютуғи” деб атади ва уларнинг Гуам учун биргаликдаги кузатув архитектураси ҳамда ҳаво ҳужумидан мудофаа ва ракетага қарши мудофаа интеграциясининг самарадорлигини текширишдаги аҳамиятини қайд этди.
Баёнотда таъкидланганидек, муваффақиятли синовлар Пентагоннинг Гуам мудофаасини ракета таҳдидларидан мустаҳкамлашга содиқлигидан далолат беради. Улар Гуамнинг такомиллаштирилган ҳаво ҳужумидан мудофаа ва ракетага қарши мудофаа тизимини яратиш бўйича кенгроқ ташаббуснинг бир қисмидир.
АҚШга тегишли, аммо унинг таркибига кирмаган Гуам АҚШнинг энг ғарбий штати — Гавайидан кўра Хитойга яқинроқ жойлашган стратегик ҳарбий истеҳком ҳисобланади.
Reutersънинг аниқлик киритишича, “у минтақада АҚШнинг потенциал душманларини ушлаб туришда муҳим рол ўйнайди”.
The Moscow Timeс нашрига кўра, АҚШда синовлар Россия 21 ноябрь куни Днепр шаҳрига ўрта масофали “Орешник” баллистик ракетасидан зарба берганидан кўп ўтмай ўтказилган. Путин ушбу ҳужумни Россия ҳудудига Ғарб ракеталарининг қўлланишига жавоб дея изоҳлаган.
АҚШ Мудофаа вазирлиги “Орешник”ни 2011 йилда синовдан ўтган РС-26 “Рубеж” қитъалараро баллистик ракетасининг ўзгартирилган версияси деб ҳисоблайди. Буюк Британия Мудофаа вазирлиги ҳам худди шундай нуқтайи назарга эга. Унинг таъкидлашича, Россияда бундай ракеталар чекланган миқдорда мавжуд.
Изоҳ (0)