Гватемалада автобус кўприкдан қулади, 51 киши ҳалок бўлди (видео) 

Гватемала пойтахтида йўловчи автобуси кўприкдан қулаб тушиши оқибатида камида 51 киши ҳалок бўлди. Бу ҳақда Associated Press хабар берди.

Ҳодиса бир нечта транспорт воситасининг тўқнашуви туфайли содир бўлгани айтилмоқда. Автобус Гватемаланинг шимоли-шарқида жойлашган Прогресо шаҳридан келаётган бўлган. У 35 метр баландликдан оқова сувли жарликка қулаган. У ағдарилиб, ярмигача сув остида қолган. Бир неча киши жиддий жароҳат олган. 

Таъкидланишича, 36 нафар эркак ва 15 нафар аёлнинг жасади топилган. Қурбонлар орасида болалар ҳам бўлган. Гватемала президенти Бернардо Аревало ҳамдардлик билдириб, мамлакатда миллий мотам эълон қилган. Ҳозирда автобус тормозининг носозлиги ҳодисага сабаб бўлгани тахмин қилинмоқда.

Автобус остидан қолган одамларни қутқариш ҳаракатлари олиб борилмоқда. Воқеа жойига фавқулодда хизматлар юборилган, йўл-патрул хизмати эса авария содир бўлган ҳудудда муқобил йўналишлар яратиш устида ишламоқда.

1 февраль куни Таиландда сайёҳларни олиб кетаётган автобус 15 метр баландликдан қулаб тушганди. Ҳодиса оқибатида 9 киши жароҳатланган. Улар орасида Россия ва Хитой фуқаролари ҳам бўлганди.

2024 йилнинг 21 декабрь куни эса Бразилиянинг жануби-шарқида автобус енгил автомобиль ва юк машинаси билан тўқнашиб кетиши оқибатида 38 киши ҳалок бўлганди. Авария автобус ғилдираги ёрилиши ортидан содир бўлган. Ҳайдовчи бошқарувни йўқотиб, юк машинасига бориб урилганди.

Сентябрь ойида эса Россияда ичида гандбол мухлислари бўлган автобус ЙТҲдан сўнг ёниб кетган, оқибатда 49 кишидан 17 нафари жароҳат олган, юк машинаси ҳайдовчиси эса вафот этганди.