Kemeron Dias “Niqob” komediyasida debyut qilganida endigina 20 yoshga kirgandi. O‘shandan beri yigirma yildan ortiq vaqt davomida u Gollivudning eng talabgir aktrisalaridan biri bo‘ldi. Biroq karyerasining yuqori cho‘qqisida malla soch ayol to‘satdan ekranlardan g‘oyib bo‘ldi. Katta rollar, gulduros qarsaklar va kino mukofotlari o‘rniga u tinch hayotni afzal ko‘rdi va u mehribon uybekasi va g‘amxo‘r ona rolini tanladi.
Yorqin debyut
Kemeron Dias 1972-yilda tug‘ilgan. Uning onasi import va eksport bo‘yicha agent, otasi esa neft qazib olish stansiyasida ishchi bo‘lgan. Aktrisaning tomirlarida kuba, ingliz va nemis qoni oqadi. Kemeron ota-onasini hurmat bilan eslaydi va ular juda mehribon bo‘lganini ta’kidlaydi. Kemeron katta opasi Shimen bilan birga katta bo‘lgan.
Bo‘lajak aktrisa ilon va sichqonlar boqib, zoolog bo‘lish haqida jiddiy o‘ylardi. U oddiy maktabda o‘qigan. Aytgancha, uning sinfdoshi bo‘lajak reper Snoop Dog bo‘lgan. Bolaligida Kemeron tengdoshlaridan baland bo‘yi va yoqimli tabassumi bilan ajralib turardi.
16 yoshida Dias Elite Model Management agentligi bilan shartnoma imzolab, o‘zini modellikda sinab ko‘radi. Uning eslashicha, o‘sha yillarda u tashqi ko‘rinishiga juda ehtiyotkorlik bilan munosabatda bo‘lgan. U doim o‘zini tengdoshlari bilan taqqoslardi.
Kemeron ilk debyuti 21 yoshida “Niqob” filmida qiladi. Unga modellik agentligi xodimlaridan biri kastingga kelishni maslahat beradi. Bu rolga tasdiqlangan Dias darhol aktyorlik mahoratidan saboq ola boshlaydi, chunki uning bu sohada hech qanday tajribasi yo‘q edi.
Ushbu komediyada Kemeron Jim Kerri bilan ajoyib tandem bo‘lib, film 1994-yilning eng ko‘p daromad keltirgan o‘nta filmi qatoriga kiradi. Intervyularidan birida aktrisa “Niqob”dan keyin uni nafis va chiroyli deb atashganligini aytadi, lekin u o‘zini bunday deb hisoblamasdi.
Mashhurlik cho‘qqisida
Bunday bosh aylantiruvchi muvaffaqiyatdan so‘ng Kemeron rejissyorlardan ko‘plab takliflar ola boshlaydi. Shunday qilib, 1996-yilda aktrisa ishtirokida 3 ta film chiqadi. 1997-yilda u “Do‘stimning to‘yi” filmida Juliya Robertsning raqibi rolini o‘ynaydi, mazkur film barcha davrlarning eng yaxshi romantik komediyalaridan biri sifatida tan olinadi.
Bir yil o‘tgach, Dias “Hamma Meri deb aqldan ozgan” filmida bosh rolni ijro etib, “Oltin globus” mukofotiga nomzod bo‘ladi. Suratga olish paytida u aktyor Mett Dillon bilan tanishadi va u bilan u qisqa vaqt davomida uchrashib yuradi.
Kemeron keyinchalik jiddiyroq rollari bilan karyerasida keskin burilish qiladi. Shunday qilib, 1999-yilda u “Jon Malkovich bo‘lish” filmida ishsiz qo‘g‘irchoqbozning baxtsiz xotini rolini o‘ynaydi. Tanqidchilardan biri shunday deb ta’kidlaydi: “Kinodagi eng go‘zal ayollardan biri bo‘lgan bu aktrisa bu filmda juda yoqimsiz ko‘rinadiki, hatto uni tanimadik”.
Yangi ming yillikning boshida Dias 2000-yilning eng yuqori daromad keltirgan filmlaridan biri bo‘lgan “Charli farishtalari” filmida ishtirok etadi. Bir yil o‘tgach, u “Ko‘rinmas sirk” va “Vanilli osmon” filmlarida rol o‘ynaydi. Oxirgi filmdagi roli uchun u nufuzli mukofotlarga nomzod bo‘lgan va ko‘plab tanqidchilarning ijobiy fikrlarini olgan.
Shundan so‘ng “Shrek” multfilmining to‘rt qismida Fionaga ovoz berish va Martin Skorseze rejissyorligidagi “Nyu York to‘dalari” dramasidagi yorqin rol bilan davom etadi. Aytgancha, Dias aynan “Nyu York to‘dalari”dagi ishini o‘z karyerasining eng yuqori cho‘qqisi deb hisoblaganini e’tirof etgan.
2010-yilda Forbes jurnalida Kemeron Dias “Eng boy va mashhur 100 ayol” ro‘yxatida 60-o‘rinni egallaydi. Keyinchalik aktrisa yana bir qator filmlarda ishtirok etadi, ularning ko‘pchiligi unchalik omadli chiqmaydi. 2013-yilda u Xaver Bardem, Penelopa Kruz va Bred Pitt bilan birga “Maslahatchi”da rol o‘ynaydi. Film yaxshi qabul qilinmagan bo‘lsa-da, Kemeronning roli so‘nggi yillarda kinodagi eng yaxshilaridan biri sifatida tan olinadi.
2014-yilda Diasning so‘nggi filmi — “Enni” musiqiy filmi ekranlarga chiqadi. Unda u bolalar uyining shafqatsiz xodimasi rolini ijro etadi. Tanqidchilarning fikricha, aktrisa “haddan tashqari hissiyotga berilgan”, “juda keskin va yoqimsiz” edi.
Shundan so‘ng Kemeron aktyorlik faoliyatida tanaffus qilishga qaror qiladi. 2017-yilda u uy va suratga olish maydonchasi o‘rtasida o‘tkazgan 20 yillik karyerasi uni charchatganini aytib, dam olishi kerakligini e’lon qiladi.
Gollivuddan uzoqda
2013-yil oxirida Dias The New York Times bestsellerlar ro‘yxatida 1-o‘rinni egallagan “Tana haqida kitob” asarini nashr etadi. Unda aktrisa har doim ham sog‘lig‘iga g‘amxo‘rlik qilmaganini tan olib, endi bunga ko‘proq e’tibor qaratganini ta’kidlaydi. 2016-yilda Kemeron “Uzoq umr ko‘rish haqida kitob”ini chop etadi. O‘shandan beri u sog‘liqni saqlash va biotexnologiyalar sohasidagi startaplarga sarmoya kiritmoqda.
2014-yilda Kemeronning yaqin dugonasi Nikol Richi uni musiqachi Benji Madden bilan tanishtirib qo‘yadi. 10 oydan keyin ular turmush qurishadi. 2019-yilda surrogat onalik orqali er-xotinning qizi dunyoga keladi. Darvoqe, Dias Gollivudda shunday yo‘l bilan ona bo‘lgan yagona ayol emas.
Yaqinda Gvinet Peltrouga bergan intervyusida Dias shaxsiy hayotiga umuman vaqti qolmasligini tushunganidan keyin kinoni tark etganini tan olgan. Faoliyatini tugatgandan so‘ng, u o‘ziga g‘amxo‘rlik qila boshlagani uchun ruhiy xotirjamlikka erishgan.
“Doim omma oldida va hammaning e’tiborida bo‘lish juda qiyin. Har doim mashhurlarga qaratilgan juda katta energiya bor va bu sizni bosim ostida his qilishingizga sabab bo‘ladi”.
Kameron barcha aktyorlarni biroz go‘dak deb hisoblaydi, chunki suratga olish maydonchasida ularga mustaqil ravishda hech narsa qilishga, hatto sumkasini ko‘tarib yurishga ham ruxsat berilmaydi. Shu tufayli ularning hayoti ko‘p jihatdan cheklangan bo‘ladi.
“Siz tanimaydigan odamlar doim siz uchun nimadir qilishga harakat qilishadi. Shu sababli o‘zimni har doim noqulay his qilardim. Men o‘zimga g‘amxo‘rlik qila olishimni, katta bo‘lishimni va hayot qiyinchiliklarini yengishimni, shuningdek, o‘zim uchun mas’uliyatni o‘z zimmamga olishim va boshqalarning fikriga ko‘ra emas, balki o‘zim xohlagandek yashashim mumkinligini o‘zimga isbot qilishim kerak edi”.
Kemeron botoks va plastik jarrohlikka qarshi bo‘lib, bu sohadagi shifokorlar xizmatidan faqat tibbiy ko‘rsatmalar bo‘yicha foydalangan. Aktrisa to‘rt marta burnini sindirgan: uch marta syorfing bilan shug‘ullanayotganda, bir marta esa shisha eshikka urib olgan. Shu sababli plastik jarrohga murojaat qilishga majbur bo‘lgan. Bundan tashqari, Dias taxminan 20 yildan buyon dezodorant va terlashga qarshi vositalardan foydalanmaydi.
Karyeraga qo‘yilgan nuqta
Aktrisa kasbini butunlay tark etishi haqida hech qachon gapirmagan. Dias ekranlarda ko‘rinmay qolganini karyerasidagi tanaffus deb ataydi. 2022-yilda esa yulduz katta kinoga qaytishga tayyorligi ma’lum bo‘ldi.
U ko‘p yillik do‘sti va hamkasbi Jeymi Foks filmida rol o‘ynaydi. Aktrisaning aytishicha, u deyarli 10 yildan so‘ng suratga olish jarayoniga qaytishidan juda hayajonlanmoqda. Ehtimol, bu safar Kemeron ish va oila o‘rtasidagi mukammal muvozanatni topishga erishar.
Izoh (0)