Эски Қозоғистондаги алкогол бозори мамлакатнинг собиқ президенти Нурсултон Назарбоевнинг укаси Болат Назарбоевга тегишли бўлган. Бу ҳақда депутат Ержан Бейсенбоевнинг парламент ялпи мажлисидаги нутқига таяниб, “Дарё”нинг Остонадаги мухбири хабар берди.
Бейсенбаев дастлаб Қозоғистонда маҳсулотларни маркалаш масаласини кўтарди. Унинг фикрича, бу тартиб яширин иқтисодиёт қисқаришига таъсир қилмайди, балки товарлар нархининг ошиши нуқтаи назаридан салбий таъсир кўрсатади.
“Тадбиркорларнинг айтишича, маркалашнинг реал қиймати товар бирлиги учун 550 (1,2 доллар) дан 3500 тенге (7,6 доллар)гача. Яъни арзон пойабзал лар 20-30 фоизга қимматлашади, бу эса кам таъминланган истеъмолчиларнинг аҳволини ёмонлаштиради”, — деди депутат.
Бундан ташқари, Ержан Бейсенбаев яширин иқтисодиёт бозорида энг катта улушни эгаллаган спиртли ичимликлар мавзусига тўхталиб ўтди.
“Қозоғистонда пойабзал ва бошқа кўплаб товарларни маркалаш жорий қилинган. Шу билан бирга, ҳукумат яширин иқтисодий бозорнинг энг катта улушига эга бўлган спиртли ичимликларни маркалашдан бош тортган. Маълумки, эски Қозоғистондаги спиртли ичимликлар бозори Болат Назарбоев қўлида эди. Балки, шунинг учун ҳам оддий тадбиркорларни қўшимча тўлов билан эксплуатация қилишган, лекин уларга тегилмаган?” — деди депутат.
Мажлис аъзоси товарларни мажбурий маркалашни бекор қилишни талаб қилган ва буни самарасиз, зарарли деб баҳолаган.
Талгат Сатибалди, Остона
Изоҳ (0)