Россия Давлат думаси вице-спикери Пётр Толстой Қозоғистон шаҳарлари аслида русларники, шу учун Россия уларга нисбатан тарихий ҳуқуқларга эгалигини айтиб, Қозоғистонни русофобияда айблади. Бу ҳақда у “Комсомольская правда” радиосига берган интервьюсида маълум қилди.
Россиялик сиёсатчи агар Москва Украина мавзусини “ёпмаса”, Қозоғистон, Арманистон ва Россияни ўраб турган бошқа давлатлар билан муаммоларга дуч келишини айтди.
Бугун Қозоғистонда маълум бир қозоқ давлатини тиклаш нуқтаи назаридан нима содир бўлаётганига қаранг. У ерда мустақиллик, лотин алифбосига ўтиш ҳақида қандай миллий мифология гулламоқда. У ерда жуда кўп қизиқарли нарсалар бор, — деди Толстой.
У қозоғистонликлар Олмаота 1867 йилдан 1921 йилгача шу ном билан мавжуд бўлган собиқ Верний шаҳри эканини унутиб қўйишларига қарши эканини айтди.
Мен нимага қарши эканимни биласизми? Улар Павлодардаги рус ўқитувчилари бу шаҳарни руслар қурганини айтгани учун, кечирим сўрашга мажбурламасинлар. Мен уларнинг Олмаота Верний шаҳри, рус казаклари қалъамиз эканини унутишларига қаршиман. Бу тарих миллий ўзликни англашда муҳимдир. Россиядан ажралиш учун эса тарихни ўйлаб топишнинг ҳожати йўқ. Агар барча ерлар Хитойга ва барча минерал ресурслар инглизларга сотилган бўлса ҳам, бундай қилиш керак эмас. Қўшнилар билан яхши муносабатда бўлиш лозим, — деб жавоб берди Давлат думаси вице-спикери.
Маълумот ўрнида, бу таниқли русларнинг Қозоғистонга нисбатан биринчи баёноти эмас. Январь ойида россиялик телебошловчи Тина Канделаки Қозоғистондаги вокзалларнинг рус тилидаги номи ўзгартирилишига норозилик билдириб, қозоқларни манқуртларга қиёслаганди. У Қозоғистон “қўшниларининг ёрдами” бўлмаганида, ўз мавжудлигини тўхтатган бўлишини таъкидлаганди.
2023 йил охирида Россия давлат думаси депутати Евгений Фёдоров Қозоғистоннинг СССР таркибидан чиқишининг ноқонунийлиги ҳақида гапирганди. Журналист Дмитрий Стешин эса Қозоғистоннинг шимолий ҳудудлари тарихан Россияга тегишли эканини бир неча бор айтган.
Изоҳ (0)