Қозоғистонда депутатлар сунъий интеллектдан ёрдам сўради (видео)

Қозоғистон парламентида аграр масалалари бўйича йиғилишда депутатлар сунъий интеллектга мурожаат қилди. Бу ҳақда Tengrinews хабар берди.

Йиғилишда икки масала — жорий ғалла баланси ва “Озиқ-овқат контракт корпорацияси” миллий компанияси фаолияти тўғрисидаги масала кўриб чиқилди. Икки соатлик муҳокамадан сўнг депутатлар йиғилиш материалларини нейротармоққа юклади. Сунъий интеллектнинг хулосаларини йиғилганларга парламент аъзоси Айдарбек Хўжаназаров ўқиб эшиттирди.

“Ғалла балансини барқарорлаштириш учун таснифланмаган донни давлат захирасига сотиб олишни ташкил қилинг. Буни ҳатто мен эмас, сунъий интеллект таклиф қилмоқда. Уни пул билан сотиб олиш ёки қизиқтириш мумкин эмас”, — деди депутат.

“Балки у сизга пулни қаердан олишни ҳам айтар? Алиса, айтинг-чи, пулни қаердан олса бўлади?”, — дея залдан мурожаат келди.

“Кейинги саволда берамиз”, — дея ваъда қилди Хўжаназаров.

Нейрон тармоғининг озиқ-овқат корпорациясини ислоҳ қилиш бўйича тавсияларини юклашда бир оз муаммо юзага келди: бу билан шуғулланган парламент аъзоси натижаларни планшетда кўрсатиш учун бир дақиқа вақт сўради.

“Чой ичаётган бўлса-чи? Қозоқ сунъий интеллекти”, — деб ҳазил қилди йиғилганлардан бири.

“Йўқ, шунчаки йиғилиш сўнгги дақиқаларгача давом этди. Ёзиб олиш, қайта ишлаш давом этмоқда. Умуман олганда, биз сунъий интеллектдан қисқача гапиришни, такрорламасликни ўрганишимиз керак. Икки соатдан, балки бир соатимиз кетди — биз бир нарсани такрорлайвердик”, — деди маъмуриятнинг аграр масалалар бўйича қўмитаси раиси Серик Эгизбоев.