Қозоғистоннинг Остона ва Қирғизистоннинг Бишкек шаҳарларида сув йўқлигидан норози бўлган аҳоли кўчага чиқиб, йўлни тўсмоқда. Бу ҳақда “Дарё” мухбири хабар берди.

Қозоғистонда ғазабланган фуқаролар “Миллениум Парк” турар жой мажмуаси ёнидаги йўлни тўсиб қўйди. Улар 8 кундирки сувсиз яшаётганликларини таъкидлаб, “сув беринглар” деб мурожаат қилмоқда.

Шунингдек, сув йўқлиги сабабли BI Group компаниясига қарашли уйда истиқомат қилувчи аҳоли ҳам йўлларни тўсиб қўйган. Қозоғистон пойтахти аҳолисининг уйида бир неча ҳафтадан бери сув йўқ.

“Остонада сув таъминоти билан боғлиқ муаммолар мавжуд ва бунга иссиқ ҳаво, боғдорчилик мавсуми ва ривожланаётган шаҳар сабаб бўлмоқда”, — дейди Остона ҳокими Женис Қосимбек.

Бишкекда ҳам ичимлик суви танқислиги кузатилмоқда. Жумладан, пойтахтнинг жанубий микрорайонларини тунги вақтда соат 23:00 дан эрталаб 06:00 га қадар сувни ўчиришга қарор қилинган. Хусусий “мойка”, ҳаммом ва сауналарни ишлатиш, кечаси суғориш ҳам тақиқланган.

Қирғизистон парламенти спикери Нурланбек Шакиев бу борада ҳеч нарса қила олмасликларини билдириб, бу иқлимга боғлиқлигини айтди.

“Муҳокама қилсак, сув кўпаймайди, музликлар эримай қолмайди”, — деди у. 

Яна бир депутат Дастан Бекешев аввалроқ бу одамларни кўчага чиқишга мажбур қилишини айтган эди ва ҳақиқатан ҳам шундай бўлди. 7 июнь куни тунда Бишкек жануби-ғарбидаги Арча-Бешик турар жой массиви аҳолиси йўлни (Жанубий магистрал) тўсиб қўйди.

Аҳоли ичимлик суви етишмаслигидан норози. Улар ҳозиргидек сув билан боғлиқ бундай муаммолар узоқ вақтдан бери бўлмагани, икки кундан бери сув йўқлигини айтмоқда.

Айни пайтда Қирғизистон пойтахтида аномал иссиқлик кузатилиб, ҳаво ҳарорати 40 даражага етган.

“Кун давомида 80 фоиз одамлар ишда бўлса, сув кимга керак? Кечқурун сувни ўчирасиз, ҳатто ҳожатхонага ҳам боролмайсиз, ювиниш ҳақида гапирмаса ҳам бўлади. Лекин сув учун тарифларни оширдингиз! Одамларнинг ғазабини синаяпсизми?”, — деб ёзади бишкекликлар ижтимоий тармоқларда.

Евгений Коротовских, Бишкек