Қозоғистон қонунчилигида “инфлюэнсер” тушунчаси мустаҳкамланади. Ижтимоий тармоқларида реклама қилган фуқаролар эса солиқ тўлашлари шарт бўлади. Бу ҳақда “Курсив медиа” хабар берди.
Қозоғистон парламенти мажлисида депутатлар онлайн платформалар бўйича қонун лойиҳасини ишлаб чиқишга киришди. Депутатлар блогерларни солиққа тортишни ҳуқуқий тартибга солишга қарор қилган. Хусусан, қонунчилар “инфлюэнсерлар” тушунчасини киритиш ниятида.
Бу ижтимоий тармоқларига жойлаштирилган реклама учун “конверт”да пул оладиган блогерларнинг солиқ тўлаши учун амалга оширилмоқда. Ижтимоий тармоқларда катта аудиторияга эга бўлган алоҳида фойдаланувчиларнинг молиявий пирамидалар ташкил этиши, сохта хайрия ишларини амалга ошириши фонида соҳани тартибга солиш зарурати пайдо бўлгани таъкидланди.
“Қонунчиликка бу билан боғлиқ кўплаб янги атамалар киритилмоқда. Иккинчи қисм онлайн платформалар фаолиятига тегишли. Бу ерда биз ‘инфлюэнсер’ тушунчасини киритамиз”, — деди депутат Айдор Сарим.
Сарим инфлюэнсерлар солиқ тўлаши кераклигини тушунтирди. Бундан ташқари, блогерлар реклама қўйишлари олдидан унга бунинг учун пул олганлари ҳақида белги қўйиши керак бўлади.
Шу билан бирга, Айдос Саримнинг таъкидлашича, бундай тартибга солиш Қозоғистонда “блогерликни ўлдириш”га қаратилган эмас. Ижтимоий тармоқларнинг фаол фойдаланувчилари блогер сифатида ишлашда давом этиши мумкин, шу билан бирга улар солиқларга амал қилиши керак бўлади.
Эслатиб ўтамиз, қозоқ оммавий ахборот воситаларига нисбатан реклама материалларини PR белгиси билан белгилаш талаби анчадан бери амал қилиб келган.
Май ойи бошида парламентнинг ялпи мажлисида депутат Анас Баккожаев Қозоғистон “ўз сўзи ва қилмиши учун жавобгар бўлмаган блогерлар ватани”га айланганини айтди. У Бош прокуратурага тегишли сўров юбориб, блогерларни “Оммавий ахборот воситалари тўғрисида”ги қонунга мувофиқ жавобгарликка тортишни талаб қилди.
Баккожаевнинг айтишича, Қозоғистонда ўзини блогер деб атайдиганлар ва ижтимоий тармоқларда ёлғон маълумотларни эълон қиладиганлар кўп.
Изоҳ (0)