Жанубий Корея июнь ойи бошида йирик ўрмон ёнғинларидан жабр кўрган Абай вилоятидаги ўрмонни тиклашга ёрдам беради. Бу ҳақда NUR.kz хабар берди.
Қозоғистон делегациясининг Сеулга ташрифи чоғида депутат Едил Жанбиршин Жанубий Кореянинг ўрмонларни қайта тиклаш бўйича катта тажрибаси борлигини таъкидлаб, ундан Қозоғистонда фойдаланишни таклиф қилди.
Осиё ўрмон хўжалиги бўйича ҳамкорлик ташкилоти АFoCО вице-президенти Абай вилоятидаги ўрмонни тиклашда ёрдам беришга тайёрлигини билдирди.
“50-60 йилларда Кореяда ўрмонларни тиклаш мақсадида 11 миллиард дарахт экилди, 2,5 миллион гектар ер тикланди. Бу борада Кореяга мазкур бой тажрибадан биз билан фойдаланишни таклиф қилдик”, – деди депутат Едил Жанбиршин.
Маълум қилинишича, томонлар ўқув машғулотларини ўтказиш ёки қозоғистонликларни амалиётга таклиф этиш масалаларини ҳам муҳокама қилган.
Қозоғистондаги ўрмон ёнғини
Республиканинг Россия билан чегарадош Абай вилоятидаги ўрмон ёнғинлари 8 июнь куни бошланди. Ёнғин майдони 60 минг гектардан ошди. Ушбу ёнғин оқибатида жами 14 киши ҳалок бўлди, улар хотирасига 12 июнь куни Қозоғистонда умуммиллий мотам куни деб эълон қилинди.
Шундан сўнг яна бир қурбоннинг жасади топилди ва ёнғин қурбонлари сони 15 кишига етди. 14 июнь куни Абай вилоятидаги ўрмон ёнғинлари ўраб олинди.
Қозоғистон президенти бўлиб ўтган воқеа учун қурбонларнинг оиласидан узр сўради ва айбдорлар жавобгарликка тортилишини айтди. У қурбонларнинг оиласига моддий ёрдам кўрсатилишини билдирди. Кейинчалик Тўқаев билан учрашган ёнғин қурбонларининг қариндошлари аслида бегона экани ҳақида хабар тарқалди, бироқ бунга расмий муносабат билдирилмади.
Ўз навбатида, Шавкат Мирзиёев йирик ўрмон ёнғинлари муносабати билан Қозоғистон президентига таъзия йўллади. Президент қурбон бўлганларнинг оила аъзолари ва яқинларига чуқур ҳамдардлик билдирди.
Изоҳ (0)