Қозоғистонда депутат Сергей Пономарев мамлакат 90 фоиз қўшни давлатлар сувига қарам эканини айтди. Сув ва ирригация вазирлиги унга жавоб қайтарди. Бу ҳақда Nur.kz хабар берди.
Депутатнинг сўзларига кўра, бугунги кунда Қизилўрда, Жамбил ва Атирау вилоятларида сувнинг кескин танқислиги кузатилмоқда. Сув хўжалиги ва ирригация вазирининг биринчи ўринбосари Болат Бекнияз эса Қозоғистон сув ресурсларининг атиги 1 фоизи аҳолини ичимлик суви билан таъминлашга сарфланишини айтди. Амалдор парламент депутати билан суҳбат чоғида аҳолини сифатли ичимлик суви билан таъминлаш борасидаги ишлар ҳақида гапирди.
Жумладан, Қозоғистонда ҳар йили 102,3 кубокилометр сув захираси тўпланади, шундан 1,2 кубокилометр, яъни умумий сув ҳажмининг 1 фоиздан ортиғи аҳолини ичимлик суви билан таъминлашга кетади. Хўжалик эҳтиёжлари учун йиллик сув сарфи 25 кубокилометрга яқин. Уларнинг 65 фоизи қишлоқ хўжалиги, 25 фоизи саноат эҳтиёжларига йўналтирилган.
“Ичимлик суви тақчил бўлади, дейиш мумкин эмас, барча меъёрий ҳужжатларда ва ўша Сув кодексида фуқароларимизни ичимлик суви билан таъминлаш масаласи биринчи ўринда туради. Яқин 2 йил ичида мамлакатимизнинг барча ҳудудларини марказлаштирилган сув таъминоти тизими билан таъминлашни режалаштирганмиз.
Табиий шароит қандай бўлишидан қатъи назар, иқлим ўзгариши ёки трансчегаравий сув ресурсларининг қисқариши, бу ичимлик суви тақчиллигига олиб келмайди. Чунки аҳолига зарур бўлган ичимлик суви ҳажми умумий йиллик сув таъминотининг атиги 1 фоизини ташкил этади”, — деди сув хўжалиги ва ирригация вазирининг биринчи ўринбосари.
Изоҳ (0)