Қозоғистон парламенти Мажилиси (қуйи палата) депутатлари Жиноят кодексидан республиканинг биринчи президенти Нурсултон Назарбоевни ҳақорат қилганлик учун жавобгарлик тўғрисидаги моддани олиб ташлаш бўйича тузатишларни кўриб чиқмоқда. Бу ҳақда парламент депутати Снежанна Имашева гапирди, унга кўра, тузатиш “техник характерга эга”.
Имашева тушунтиришича, ўзгартириш 2022 йил июнь ойида бўлиб ўтган конституциявий референдум натижаларига кўра, Элбоши тўғрисидаги низомнинг асосий қонундан чиқариб ташлангани билан боғлиқ.
“Элбоши мақоми энди мавжуд эмас, шунинг учун жиноий жавобгарликка ҳам ортиқ зарурат йўқ, у қўлланилмайди ҳам”, — деди депутат.
Қозоғистон Адлия вазирлиги биринчи президентнинг шаъни ва қадр-қимматини оммавий ҳақорат қилиш ва бошқа турдаги тажовузлар учун жиноий жавобгарликни назарда тутувчи моддаларни Жиноят кодексидан чиқариб ташлаш режалаштирилаётганини тасдиқлади. Снежанна Имашеванинг қўшимча қилишича, бу қоида фақат Элбошига тааллуқли, “унда оиласи ҳақида гап йўқ”.
Нурсултон Назарбоев 1989 йилнинг июнидан 2019 йилнинг мартигача Қозоғистон раҳбари бўлган. 2010 йилдан бери у Қозоғистон Республикасининг биринчи президенти — Элбоши расмий унвонига эгалик қилиб келган.
2022 йилда Қозоғистонда референдум натижасида конституция янгиланди, шу қаторда ундан республиканинг биринчи президенти ҳақидаги барча ҳаволалар чиқариб ташланди. 2023 йил февраль ойида Қозоғистон президенти Қосим-Жўмарт Тўқаев фармонни имзолади, унга кўра “Қозоғистон Республикасининг биринчи президенти — Элбоши (миллат етакчиси) тўғрисида”ги қонун ўз кучини йўқотган деб топилди. Бу қонун Нурсултон Назарбоевга миллат етакчиси мақомини берар ва унга бир умрлик имтиёзларни кафолатлар эди.
Изоҳ (0)