Олий Мажлис Қонунчилик палатасининг 2025 йил 14 январдаги мажлисида автобус учун ажратилган йўлакларда бошқа транспорт воситалари ҳаракатлангани учун жавобгарлик кўзда тутилган қонун лойиҳаси иккинчи ўқишда қабул қилинди.
“Ўзбекистон Республикасининг Маъмурий жавобгарлик тўғрисидаги кодексига жамоат транспортидан фойдаланиш самарадорлигини оширишга қаратилган қўшимча ва ўзгартиришлар киритиш ҳақида”ги қонун лойиҳаси билан Маъмурий жавобгарлик тўғрисидаги кодексига транспорт воситалари ҳайдовчиларининг йўналишли транспорт воситалари учун алоҳида ажратилган тасмаси бор йўлдан ҳаракатлангани учун жавобгарлик белгиланмоқда. Хусусан, кодекс 128-7-моддаси билан тўлдирилмоқда.
Бунда қуйидаги ҳолатлар учун жавобгарлик белгиланмайди:
- алоҳида ажратилган тасмаси бор йўлдан тезкор ва махсус хизматларнинг транспорт воситаларининг ҳаракатлангани;
- ёндош ҳудуднинг кириш ёки чиқиш жойидан 50 метр масофада узуқ-узуқ чизиқли жойгача ёхуд яқин масофадаги узуқ-узуқ чизиқли жойгача ҳаракатланганлик;
- йўналишли транспорт воситалари ҳаракатига халақит бермаслик шарти билан йўлга чиқиш;
- қатнов қисмининг четки ўнг томонида йўловчиларни чиқариш ва тушириш учун ҳаракатланганлик.
Мажлисда сўзга чиққан Коррупцияга қарши курашиш ва суд-ҳуқуқ масалалари қўмитаси аъзоси Улуғбек Қобуловнинг мазкур қонун лойиҳаси Президент администрациясининг 2024 йилнинг сентябрь ойидаги топшириғи ижросини таъминлаш учун ИИВ томонидан ишлаб чиқилганини қайд этди. Қонун лойиҳаси 2024 йилнинг 11 декабрида биринчи ўқишда кўриб чиқилиб, қабул қилинганди. Уни иккинчи ўқишга тайёрлашда янада такомиллаштирилиб, маромига етказилди.
Улуғбек Қобуловнинг сўзларига кўра, маъмурий жарима миқдорини белгилашда бир қатор хорижий давлатлар тажрибаси ўрганилди. Хусусан, АҚШнинг Нью Йорк штатида бундай ҳуқуқбузарлик учун 50−250 доллар, Францияда — 35−135 евро, Германияда — 135 еврогача, Беларусда — 12 доллар (такрор содир этилганда — 25 долларгача), Қозоғистонда 7 доллар (такрор содир этилганда — 70 долларгача) миқдорида жарима ундирилиши аниқланган.
“Юқоридагиларни ҳисобга олиб, ташаббускор масъул ходимлар билан таклиф этилган модданинг санкцияси миқдорини туширишга қарор қилдик”, деди депутат, бироқ унинг миқдорларига аниқлик киритмади.
Дастлаб қоидабузарликни биринчи марта содир этганлик учун БҲМнинг 3 баравари (1 млн 125 минг сўм), такрор содир этганлик учун БҲМнинг 5 баравари (1 млн 875 минг сўм) миқдорида жарима белгилаш таклиф этилганди.
Изоҳ (0)