20-сентябрь куни парламент депутатлари “Қозоғистон Республикасининг айрим қонун ҳужжатларига Миллий фонддан болаларга тўловлар тўлаш масалалари бўйича ўзгартириш ва қўшимчалар киритиш тўғрисида”ги қонун лойиҳасини қабул қилди, деб ёзмоқда “Орда.кз”.
Шунингдек, “Миллий фаровонлик фонди тўғрисида”ги қонунга Назарбоевни Жамғарма бошқарув кенгаши таркибидан чиқариб ташлашни назарда тутадиган ўзгартиришлар киритилди.
Депутат Берик Бейсенгалиев ушбу тузатишлар нима учун қабул қилинганини тушунтирди.
“Самрук-Казинаъ жамғармасини бошқарадиган кенгаш бор. Яна директорлар кенгаши, бошқарув кенгаши бор. Жамғарма бошқаруви кенгашининг иши директорлар кенгаши функцияларини такрорлайди. Шунинг учун биз Фонд бошқарув кенгашини тугатишга қарор қилдик. Директорлар кенгаши ўз ўрнида қолади, Назарбоев унинг таркибида йўқ”, — деди депутат.
Бейсенгалиевнинг қайд этишича, буларнинг барчаси Қозоғистонда биринчи президент тўғрисидаги қонун ўз кучини йўқотгани муносабати билан содир бўлмоқда. Шунинг учун ҳозир Назарбоев барча мақом ва лавозимлардан методик равишда маҳрум қилинмоқда.
Назарбоев тўғрисидаги қонун
Қозоғистонда “Биринчи президент тўғрисида”ги қонун 2000 йилда қабул қилинган. Унга кўра, Элбоши унвони билан Нурсултон Назарбоев алоҳида мавқега эга эди – биринчи президентни ҳибсга олиш, тинтув қилиш, сўроққа чақириш ва қамаш мумкин эмасди. Қонун Назарбоев ва унинг оила аъзоларига тегишли мулк ва банк ҳисоблари дахлсизлигини кафолатларди. Уларнинг барчаси умрбод хавфсизлик, алоқа, транспорт ва бошқа имтиёзлар билан таъминланган эди.
Қозоғистон депутатлари ушбу қонунни бекор қилиш ташаббусини 2022 йилнинг баҳорида, амалдаги давлат раҳбари Қосим-Жўмарт Тўқаев конституцияни кенг кўламли ислоҳ қилиш ҳақида эълон қилганидан кейин билдирди. 2023 йил январида Қозоғистонда Мажлис (парламент) депутатлари биринчи президент тўғрисидаги қонунни ўз кучини йўқотган деб топди. Июль охирида Назарбоев давлат қўриқчиларидан маҳрум қилинди.
Изоҳ (0)