Қозоғистон парламенти Мажлиси депутати Мақсат Тўлиқбайнинг айтишича, Нурсултон Назарбоевнинг қамоқдаги тадбиркор жияни меҳмонхона сотиб олган. Кўчмас мулк қиймати 6 миллиард тенгега (13 388 971 доллар) баҳоланмоқда, деб хабар берди “Дарё”нинг Қозоғистондаги мухбири.
“Қайрат Сатибалдиули ҳибсда ўтирганида Баидала МЧЖ билан олди-сотди шартномасини тузган. Яъни, қамоқхонага нотариус келган, ҳибсдаги Сатибалди 6 миллиард тенге топиб, уни ушбу компанияга ўтказган”, — деди депутат.
Депутат ўзининг Facebook саҳифасида келишув тафсилотларини айтиб берди. У бу ҳақда Олмаотадаги Ҳилтон меҳмонхонаси раҳбарияти ва ходимлари билан учрашувда хабар топганини маълум қилди.
Меҳмонхона эгасининг айтишича, бино 2019 йилда франшиза шартномаси асосида қурилган, бунинг учун меҳмонхонадан 4,2 миллиард тенге (9 372 280 доллар) миқдорида банк кредити олинган. 2020 йилда меҳмонхона пандемия сабабли вақтинча ёпилган. Бу вақтда банк меҳмонхонани коллектор агентлигига топширган, у эса қандайдир Баидала МЧЖга бозор нархидан анча паст нархда сотган. Меҳмонхона эгаси буни босқинчилик деб атади ва бунинг ортида Қайрат Сатибалдиули турганини айтди.
Мақсат Тўлиқбай аризачиларнинг барча шикоятларини Коррупцияга қарши кураш агентлиги ва Бош прокуратурага юборганини айтди. Унга мурожаат қилганлар фақат бир нарсани — ваколатли органлар бу ишни адолатли кўриб чиқишини сўрашмоқда.
Эслатиб ўтамиз, Қайрат Сатибалдиулига нисбатан пойтахт судида ҳукм чиқарилган. У тегишли моддалар бўйича, олти йилга қамалган, мулки мусодара қилинган ва 10 йил муддатга давлат хизмати ва миллий компанияларда лавозимларни эгаллаш ҳуқуқидан маҳрум қилинган .
Талгат Сатибалди, Остона