Миллионлаб томошабинларнинг болаликдаги севимли мультфильми “Том ва Жерри” катта экранларга қайтмоқда. Бу ҳақда “Корреспондент.нет” хабар берди.
Маълум бўлишича, Warner Bros Pictures Animation студияси мазкур мультфильмнинг янги талқиндаги тўлиқ метражли фильмини яратади. Сценарий устида кино ва телевидениедаги фаолияти билан танилган Рашида Жонс ҳамда “Оскар” мукофотига сазовор бўлган ёзувчилар Майкл Гове ва Уилл Маккормак ишламоқда.
Машҳур мультфильмнинг янги версияси мушук ва сичқоннинг танишувидан бошланади. Илк бор MGМ туфайли экранларга чиққан Том ва Жеррининг саргузаштлари ҳақидаги мультфильм замонавий тарзда тасвирланади. Мазкур компания аввалроқ ўзининг анимация бўлими ёпилишидан аввал 114 та қисқа метражли фильмни суратга олган ва улар етти карра “Оскар”ни қўлга киритган.
Ҳозирча янги мультфильм сюжети, премьера санаси сир сақланмоқда.
Маълумот учун: “Том ва Жерри” — мушук Том ва сичқон Жерри бош ролларда бўлган Америка мультсериали. Ушбу мультфильмнинг илк қисмлари бошқа — Puss Gets the Boots номи билан эфирга берилган. Биринчи қисмларда қаҳрамонларнинг ҳам исми бошқача бўлган. Том — Жаспер, Жерри — Жинкс. Кўпчиликнинг болалигини ёдга солувчи ушбу мультсериалнинг “оталари” мултипликатор Уилям Ҳанна ва Жозеф Барбера ҳисобланади. Мультфильмнинг бошланишидаги шерни кўпчилик эсласа керак. У мана шу мулцериал яратилган машҳур Metro Goldwyn Mayer киностудиясининг “юзи” саналади.
Дастлаб мультфильм 1940—1958 йиллар давомида Metro Goldwyn Mayer студиясида яратилган. Бу давр давомида ишланган қисмларга Фред Куимби продюсерлик қилган. Болалигимизга ҳамроҳ бўлган мультсериал мусиқаларини Скотт Бредли басталаган.
Изоҳ (0)