Қозоғистонда 2024 йил бошидан буён битта терактнинг олди олинди. Бу ҳақда Миллий хавфсизлик қўмитаси маълумотига таяниб, “Закон.кз” хабар берди.
Олди олинган террорчилик ҳаракати билан бир қаторда, йил бошидан буён террорчилик ва экстремистик фаолият учун 26 нафар шахс судланган. Бундан ташқари, экстремизм ва терроризмга алоқадор 151 нафар хорижлик мамлакатга киритилмаган, 19 нафар чет эл фуқароси тақиқланган диний адабиётларни республикага олиб кириш билан боғлиқ фаолияти учун жавобгарликка тортилган.
Таъкидланишича, 356 та терроризмга қарши ўқув тадбирлари олиб борилган. Қозоғистон Ички ишлар вазирлиги билан биргаликда терроризмга мойил объектлар, жумладан, одамлар кўп йиғиладиган жойларда уч мингдан ортиқ текширув ўтказилган.
Аввалроқ Қозоғистон президенти Қосим-Жўмарт Тўқаев барча давлатларни терроризмга қарши курашда бирлашишга чақирганди. Қозоғистон раҳбарининг сўзларига кўра, Остона биринчилардан бўлиб Crocus City Hall’даги терактни қоралаган ва Москва билан бирдамлик билдирган.
Изоҳ (0)