Германия расмийлари мамлакатда 22 март Москва вилоятидаги Crocus City Hallъда юз берган теракт каби террорчилик ҳужуми содир бўлишидан огоҳлантирди. Бу ҳақда Financial Times хабар берди.
“Европа, шу жумладан, Германия, жиҳодчи ташкилотлар, хусусан, ИШИД нишонида”, — деди Германия ички ишлар вазири Ненси Фаэсер.
У Афғонистонда фаолият юритувчи ИШИД Хуросонига ишора қилиб, айнан шу бўлинма Москвада юз берган теракт учун жавобгарликни ўз зиммасига олганини эслатди.
“Эҳтимолий сценарий бу яқинда Москвада кўрганимизга ўхшаш, кенг кўламли, мувофиқлаштирилган ҳужумдир”, — деди Германия ички разведка бошқармаси бошлиғи Томас Халденванг ва ИШИДнинг Хуросон бўлими “энг хавфли гуруҳ” эканини айтди.
Огоҳлантириш Германиянинг Европа чемпионатига мезбонлик қилиши билан бир вақтда эълон қилинди. Амалдорлар мазкур тадбир жиҳодчи террорчилар учун “жозибали нишон” бўлиши мумкинлигидан огоҳлантирган. ИШИД Хуросонининг тарғибот бўлими яқинда футбол стадионида автомат тутган қуролли шахс тасвирланган, “Охирги голни уринг!” деган ёзув акс этган расми эълон қилган.
Hohenheym университети томонидан ўтказилган сўровга кўра, одамларнинг 20 фоизи террор ҳужумларидан қўрқиб, Euro 2024 ўйинларининг жамоавий томошаларидан четланмоқчи.
Ҳалденвангнинг сўзларига кўра, гуруҳ ўз тарафдорларини Европадаги “юмшоқ нишонларга” ҳужум қилишга чақирувчи кўплаб тарғибот видеоларини жойлаштирган, бу 2015 йилда Париждаги Батаклан театри ва унинг атрофида, кейинги йили эса Брюссел аэропорти ва метро тизимида содир этилган ҳужумларни эслатади.
“Бу ИШИД Хуросони орзу қиладиган нарсадир”, — деди Германия ички разведка раҳбари.
Мутахассислар фикрича, 2015 йилда Афғонистонда ташкил этилган ИШИД Хуросони 2021 йилда АҚШ Кобулдан қўшинларини олиб чиқиб кетганидан сўнг кучайиб, ҳукмрон “Толибон”нинг гуруҳни йўқ қилиш учун олиб борган қонли исёнга қарши кампаниясига қарамай, халқаро фаолиятини кучайтирган.
Изоҳ (0)