Тожикистоннинг Россиядаги элчихонаси 10 сентябрь куни республика фуқароларига бу мамлакатга сафар қилишдан тийилишни тавсия қилди.
Россияда қуруқлик ва ҳаво ўтказиш пунктларида чет эл фуқароларининг давлат чегараси орқали киришини қаттиқ назорат қилиш режими давом этаётгани сабабли Тожикистоннинг Россиядаги элчихонаси республика фуқароларига ушбу мамлакатга вақтинча бормасликларини тавсия қилади.
Элчихона худди шу таъриф билан республика фуқароларига Беларусга ҳам вақтинча сафар қилишдан тийилишни тавсия этмоқда. Бу Тожикистоннинг ўз фуқароларига Россияга бормасликни тавсия қилган биринчи ҳолат эмас. Хусусан, Crocus City Hall’даги теракт ва унга алоқадорликда гумон қилинган тожикистонликларнинг ҳибсга олиниши, шунингдек, кенг кўламли рейдлар ва текширувлардан сўнг, мамлакат Ташқи ишлар вазирлиги, зарурат бўлмаган тақдирда, Россияга саёҳат қилмасликни сўраганди.
Текширувлар натижасига кўра, сўнгги бир неча ой ичида Россия минглаб тожикларнинг мамлакатга киришини рад этган ёки депортация қилган. Сўнгги олти ойда 17 мингдан ортиқ Тожикистон фуқаролари Россиядан чиқариб юборилган.
5 сентябрь куни Қирғизистон Ташқи ишлар вазирлиги ўз фуқароларидан Россияга бормасликни сўраганди.
Аксарият муҳожирларнинг айтишича, Crocus’га қилинган ҳужумдан сўнг босим шу даражага етганки, Россияда яшаш ва ишлаш “чидаб бўлмас” бўлиб қолган.
Изоҳ (0)