Қирғизистон Ташқи ишлар вазирлиги фуқароларга Россияга боришдан вақтинча воз кечишни тавсия қилди. Бу ҳақда Қирғизистон ташқи ишлар вазирлиги сайтидаги хабарда айтилади.
“Вазирлик Россия Федерациясига бориш учун узрли сабаблари бўлмаган ватандошларга аввал жорий этилган қўшимча хавфсизлик чоралари ва давлат чегараси орқали киришда кучайтирилган назорат режими бекор қилинмагунча, Россия Федерацияси ҳудудига боришдан вақтинча воз кечишни тавсия қилади. Агар Россияга борадиган бўлсангиз, сизда мамлакатга кириш учун чекловлар бор ёки йўқлигини олдиндан текшириб олишингиз керак”, дейилади хабарда.
Апрель ойи бошида Қирғизистон ташқи ишлар вазири ўринбосари Алмаз Имангазиэв Crocus City Hallъдаги терактдан кейин 70 га яқин мамлакат фуқароси Россия ҳудудига киритилмаганини маълум қилган эди.
25 март куни ҳам Қирғизистон Ташқи ишлар вазирлиги ватандошларига узрли сабабларсиз Россияга боришдан вақтинча бош тортишни тавсия қилганди.
Изоҳ (0)