ИШИДнинг Хуросон бўлими террорчилик гуруҳи 23 июнь куни Доғистонда содир этилган терактлар юзасидан баёнот берди. Бу ҳақда The Khorasan Diary хабар берди.
Кавказлик биродарларимиз ҳали ҳам кучли ҳамда нималарга қодир эканликларини кўрсатдилар, — дейилади Хуросон бўлими баёнотида.
Америка урушни ўрганиш институти (ISW) таъкидлаганидек, ушбу баёнотда Хуросон бўлимининг террорчилик хуружларига алоқадорлиги кўрсатилмаган. Шунингдек, Кавказ ҳақида сўз юритилиши ҳужум учун жавобгарлик ИШИДнинг Шимолий Кавказдаги филиали “Вилояти Кавказ” зиммасида эканлигига ишора қилган.
“Вилояти Кавказ” 23 июнь куни Доғистон Республикасидаги черковлар, синагогалар ва ҳуқуқ-тартибот идораларига мураккаб ва мувофиқлаштирилган ҳужум уюштирган бўлиши мумкин, — дея хулоса қилган ISW.
ISW таъкидлашича, Шанхай ҳамкорлик ташкилотининг (ШҲТ) минтақавий аксилтеррор тузилмаси аввалроқ ИШИД Crocus City Hall’даги терактдан сўнг “Вилояти Кавказ” жангариларини фаоллаштиришга уринаётгани ҳақида огоҳлантирган.
2015 йил июнь ойида ташкил этилган “Вилояти Кавказ” ИШИД бўлими аввалроқ Кавказ ва Россиянинг бошқа минтақаларида қатор шов-шувли терактлар содир этиш учун жавобгарликни ўз зиммасига олган эди. 2017 йилда гуруҳ Россия Миллий гвардиясининг Чеченистондаги ҳарбий қисмига ҳужум қилиб, олти нафар ҳарбийни ўлдирганини эълон қилган эди. 2019 йилда террорчилар 2018 йилнинг 31 декабрь куни Магнитогорскдаги турар жой биносида портлаш содир этиб, 39 киши ҳалок бўлганини айтишган. Шунингдек, 2019 йилда гуруҳ Чеченистон раҳбари Рамзан Қодировнинг Грознийдаги қароргоҳи яқинида полицияга ҳужум қилганини даъво қилган эди.
24 июнь куни жангариларнинг икки гуруҳи Дербент ва Махачқалъадаги черков ва синагогаларга, шунингдек, полиция ходимлари ва Россия Миллий гвардияси ходимларига ҳужум қилди. Россия Тергов қўмитаси маълумотларига кўра, терактлар оқибатида 19 киши ҳалок бўлган, улардан 15 нафари ҳуқуқ-тартибот ходимларидир.
Изоҳ (0)