Москва вилоятида 2025 йил 1 январдан бошлаб мигрантларга алкоголь ва тамаки савдоси, кўча таомлари, ижтимоий хизматлар, спорт, маданият, дам олиш, соғлиқни сақлаш ва таълим соҳаларида патентлар асосида ишлаш тақиқланади.
Вилоят ҳукумати раисининг ўринбосари Наталия Масленкина буни маҳаллий аҳолининг мигрантлар иши бўйича шикоятлари кўпайиб кетгани билан изоҳлади. Унинг айтишича, тақиқ “эҳтимолий келишмовчиликларни камайтириш” мақсадида жорий этилган.
Ҳозирда Москва вилоятида алкоголь, пиво ва тамаки сотувчи чакана савдо дўконларига уларни жалб қилишга йўл қўйиладиган чеклов (15 фоиз) мавжуд. Биз патентлар бўйича ишлашни тўлиқ тақиқлаган 22 та ҳудудга қўшилишни хоҳлаймиз, деди у.
Ушбу тақиқлар жорий этилганда, ўрнини босадиган патент эгалари сони 5,6 минг кишини ташкил этади. Масленкинанинг фикрича, уларнинг ўрнини россияликлар ва Евросиё иқтисодий иттифоқи (ЕОИИ) аъзо давлатларининг фуқаролари эгаллаши мумкин. Бу ташкилотга Россиядан ташқари Арманистон, Беларусь, Қозоғистон ва Қирғизистон ҳам киради.
Москвадаги Crocus City Hall’да юз берган терактда Тожикистон фуқаролари асосий ташкилотчилар сифатида қаралганидан сўнг Россияда чет элликлар ва меҳнат мигрантларига нисбатан сиёсат кескинлашди. Турли ҳудудларда мигрантларнинг иш ва яшаш жойларида рейдлар ўтказилди. Ҳужжатлар билан боғлиқ муаммолари аниқланганлар депортация қилинди. Кўпгина хорижликларга Россиядаги аэропорт ва назорат-ўтказиш пунктларида киришга рухсат берилмаган ҳолат ҳам кузатилган.
Изоҳ (0)