Озарбайжон Россия фуқаролари учун мамлакатда бўлиш қоидаларини кучайтирмоқчи. Бу ҳақда Озарбайжон Ташқи ишлар вазирлиги матбуот котиби Айхан Гажизаде хабар берди.
Расмийнинг таъкидлашича, ушбу чоралар Россиянинг миграция сиёсатидаги Озарбайжон фуқароларига ҳам таъсир этувчи ўзгаришларга жавобан ишлаб чиқилмоқда.
“Мамлакатда вақтинчалик бўлиш ва миграция масалаларида Озарбайжон ташқи сиёсатнинг бошқа жиҳатларида бўлгани каби тенглик ва ўзаролик тамойилларига амал қилади”, деди Гажизаде.
У тегишли ўзгаришлар яқин кунларда кучга киришини қўшимча қилди.
Россия томони 26 декабрь куни чет эл фуқаролари учун янги қоидаларни эълон қилди. 1 январдан бошлаб Россияга визасиз кирадиган хорижликлар мамлакатда бир йил давомида жами 90 суткадан ортиқ бўлиши мумкин эмас. Илгари уларга ҳар ярим йилда 90 кун бўлишга рухсат берилган эди.
Россияда миграция сиёсатининг кучайтирилиши 22 март куни Москва яқинидаги Crocus City Hallъда содир бўлган теракт воқеасидан кейин бошланди.
Ушбу воқеа фонида Россия ҳуқуқ-тартибот органлари ноқонуний муҳожирларни кенг кўламли текширишни бошлади — бу 2013 йилдан бери энг йирик текширув ҳисобланади. Ички ишлар вазирлиги миграция қонунчилигига ўзгартиришлар киритиш ташаббуси билан чиқди. Июнь ойида Давлат думаси чет эл фуқароларининг ҳуқуқларини чекловчи қонунни қабул қилди. Чора-тадбирлар орасида мигрантларнинг махсус реестрини яратиш, яшаш жойини ўзгартиришни чеклаш, транспорт воситаларини бошқариш, никоҳ тузиш ва банк ҳисобварақларини очиш каби масалалар мавжуд.
Изоҳ (0)