2 январь куни эрталаб Москвадан Норилскка етиб келган Sibir Airlines авиакомпаниясининг Airbus 321А лайнери аэропортга қўнгач, бурилиш вақтида учиш-қўниш йўлагидан чиқиб кетди. Бу ҳақда Ғарбий Сибир транспорт прокуратураси маълум қилди.
Дастлабки маълумотларга кўра, бугун соат 08:00 атрофида Н.Н.Урвацев номидаги Норилск халқаро аэропортига Москвадан учиб келган “Сибир” авиакомпаниясининг Airbus 321А самолёти қўниш тугагандан сўнг, бурилишни амалга ошираётган пайтда учиш-қўниш йўлагидан ташқарига чиқиб кетган, дейилади хабарда.
Назорат қилувчи орган маълумотларига кўра, самолёт бортида 79 нафар йўловчи бўлган. Ҳодисадан сўнг мазкур самолёт парвозлардан вақтинча четлатилган.
Москвага қайтиш рейси учун захирадаги самолёт ажратилган.
Самолётлар билан боғлиқ сўнгги пайтлардаги бошқа ҳодисалар
25 декабрь куни Боку-Грозний маршрути бўйича учган самолёт Қозоғистоннинг Оқтов шаҳрида қулаган, оқибатда 38 нафар одам ҳалок бўлганди.
28 декабрь куни Канаданинг Галифакс аэропортида самолёт қўниш чоғида ёниб кетгани хабар қилинган. Йўловчиларнинг сўзларига кўра, самолёт шассисининг ғилдиракларидан бири ишламай қолган. Галифакс аэропорти самолёт бортидаги барча йўловчилар ва экипаж аъзолари эвакуация қилинганини хабар берди.
29 декабрь, якшанба куни маҳаллий вақт билан соат 9:07 да Jeju Air авиакомпаниясининг Boeing 737-800 йўловчи самолёти Жанубий Кореяда ҳалокатга учради. Таиланднинг Бангкок шаҳридан Жанубий Кореянинг Муан шаҳрига учаётган самолёт қўниш вақтида учиш-қўниш йўлагидан чиқиб кетган ва панжарага урилган, шундан сўнг у икки қисмга бўлинган ва ёниб кетган, 177 нафардан ортиқ одам ҳалок бўлган.
29 декабрь куни Бирлашган Араб Амирликларида Jazirah Aviation Club авиакомпаниясига тегишли енгил моторли самолёт денгизга қулаб тушди. Маълум қилинишича, авиаҳалокат оқибатида учувчи ва ҳамроҳи ҳалок бўлган.
Изоҳ (0)