Оқтовда ҳалокатга учраган Embraer 190 йўловчи самолётида ҳалок бўлган экипаж аъзоларига вафотидан сўнг “Озарбайжоннинг миллий қаҳрамони” унвони берилди. Бу ҳақда Azerbaijan Airlines авиакомпанияси маълум қилди.
Фото: “Президент.аз”
Таъкидланишича, 29 декабрь куни Озарбайжон президенти Илҳом Алиев Боку—Грозний рейсини амалга оширувчи “Озарбайжон ҳаво йўллари” ёпиқ акциядорлик жамиятига қарашли Embraer 190 йўловчи самолёти ҳалокатида юксак профессионаллик ва жасорат кўрсатган шахсларни мукофотлаш тўғрисида” фармон қабул қилган.
Фармон билан самолётнинг ҳалокатга учраши чоғида хизмат вазифаларини бажариш ва йўловчилар ҳаётини сақлаб қолишда кўрсатилган юксак профессионаллик, жасорат ва фидоийлик учун учувчилар Игор Кшнякин, Александр Калянинов ва борткузатувчи Ҳокума Алиевага вафотидан сўнг “Озарбайжоннинг миллий қаҳрамони” унвони билан, рейснинг омон қолган борткузатувчилари Айдан Раҳимли ва Зулфуқор Асадов эса биринчи даражали “Рашодат” ордени билан мукофотланган.
Оқтов шаҳрида самолёт ҳалокати: нима юз берди?
2024 йил 25 декабрь куни Октов аэропортидан уч километр узоқликда Озарбайжоннинг Azerbaijan Airlines (AZAL) авиакомпаниясига тегишли Embraer 190 самолёти иштирокида фожиали авиаҳалокат юз берди. Боку—Грозний рейсини амалга ошираётган самолёт фавқулодда қўнишга уринаётганда ҳалокатга учради. Самолёт бортида 62 йўловчи ва 5 экипаж аъзоси бўлган.
Текширув ва фаразлар
Ҳалокатни текширишга Қозоғистон ИКАО конвенциясига мувофиқ раҳбарлик қилмоқда. Ишда Озарбайжон, Россия мутахассислари, халқаро экспертлар ва Embraer 190 вакиллари иштирок этмоқда. Қора қутилар олиб қўйилиб, халқаро экспертлар иштирокида таҳлил қилинмоқда.
Озарбайжон оммавий ахборот воситалари, шунингдек, Euronews ва Reuters ҳалокат сабабларидан бири сифатида Россия ҳаво ҳужумидан мудофаа воситаларининг ишлаши ҳақидаги тахминларни муҳокама қилувчи материалларни эълон қилди.
28 декабрь куни Владимир Путин Россия ҳаво ҳудудида фожиали ҳодиса юз бергани муносабати билан узр сўради ва ҳалок бўлганларнинг оила аъзоларига яна бир бор чуқур ҳамдардлик билдирди, жароҳатланганларнинг тез соғайиб кетишини тилади.
29 декабрь куни Илҳом Алиев Озарбайжон фуқаро самолёти Россия ҳудудида, Грозний шаҳри яқинида ташқаридан шикастланганини ва деярли бошқарувни йўқотганини маълум қилди. Унинг сўзларига кўра, кема радиоэлектрон кураш воситалари билан бошқариб бўлмайдиган ҳолатга келтирилган.
Бундан ташқари, Озарбайжон президенти Россияга нисбатан талабларни эълон қилди.
“Биринчидан, Россия томони Озарбайжондан кечирим сўраши керак. Иккинчидан, у ўз айбини тан олиши керак. Учинчидан, айбдорлар жазоланиши ва жиноий жавобгарликка тортилиши, Озарбайжон давлати, жабрланган йўловчилар ва экипаж аъзоларига товон тўланиши керак. Бу бизнинг шартларимиз. Улардан биринчиси кеча бажарилди. Умид қиламанки, қолган шартларимиз ҳам қабул қилинади,” деди Алиев.
Бортда қанча йўловчи бўлган
Қозоғистон Фавқулодда вазиятлар вазирлиги маълумотларига кўра, бортда 62 йўловчи ва 5 экипаж аъзоси бўлган:
42 нафар Озарбайжон фуқароси;
16 нафар Россия фуқароси;
6 нафар Қозоғистон фуқароси;
3 нафар Қирғизистон фуқароси.
Омон қолганлар орасида Озарбайжон, Россия ва Қирғизистон фуқаролари бор. Маълумотларга кўра, шу вақтгача 29 киши ҳалокатдан омон қолган, айримларининг аҳволи оғир.
Изоҳ (0)