Норвегиядан Нидерландияга учаётган йўловчи самолёти фавқулодда қўниш вақтида учиш-қўниш йўлагидан чиқиб кетди.
Голландиянинг Royal Aviation Company авиакомпанияси маълумотларига кўра, самолёт Осло аэропортидан кўтарилиш вақтида баланд овоз эшитилганидан сўнг Саннефёрд халқаро аэропортига йўналтирилган.
Фавқулодда қўниш чоғида Boeing 737-800 самолёти учиш-қўниш йўлагидан чиқиб, ўтлар устида тўхтаб қолган.
Самолётнинг 176 нафар йўловчиси ва 6 нафар экипаж аъзоси эвакуация қилинган, улардан ҳеч бири жабрланмаган. Ҳодиса юзасидан тергов бошлангани маълум қилинди.
Норвегия матбуотига кўра, самолёт гидравлик тизимдаги носозлик туфайли фавқулодда қўнишни амалга оширган.
29 декабрь, якшанба куни маҳаллий вақт билан соат 9:07 да Jeju Air авиакомпаниясининг Boeing 737-800 йўловчи самолёти Жанубий Кореяда ҳалокатга учради. Таиланднинг Бангкок шаҳридан Жанубий Кореянинг Муан шаҳрига учаётган самолёт қўниш вақтида учиш-қўниш йўлагидан чиқиб кетган ва панжарага урилган, шундан сўнг у икки қисмга бўлинган ва ёниб кетган. Охирги маълумотларга кўра, 177 нафардан ортиқ одам ҳалок бўлган.
28 декабрь куни Канаданинг Галифакс аэропортида самолёт қўниш чоғида ёниб кетгани хабар қилинган. Йўловчиларнинг сўзларига кўра, самолёт шассисининг ғилдиракларидан бири ишламай қолган. Галифакс аэропорти самолёт бортидаги барча йўловчилар ва экипаж аъзолари эвакуация қилинганини хабар берди.
25 декабрь куни Боку-Грозний маршрути бўйича учган самолёт Қозоғистоннинг Оқтов шаҳрида қулаган, оқибатда 38 нафар одам ҳалок бўлганди.
Изоҳ (0)