2-yanvar kuni ertalab Moskvadan Norilskka yetib kelgan Sibir Airlines aviakompaniyasining Airbus 321A layneri aeroportga qo‘ngach, burilish vaqtida uchish-qo‘nish yo‘lagidan chiqib ketdi. Bu haqda G‘arbiy Sibir transport prokuraturasi ma’lum qildi.
Dastlabki ma’lumotlarga ko‘ra, bugun soat 08:00 atrofida N.N.Urvatsev nomidagi Norilsk xalqaro aeroportiga Moskvadan uchib kelgan “Sibir” aviakompaniyasining Airbus 321A samolyoti qo‘nish tugagandan so‘ng, burilishni amalga oshirayotgan paytda uchish-qo‘nish yo‘lagidan tashqariga chiqib ketgan, deyiladi xabarda.
Nazorat qiluvchi organ maʼlumotlariga ko‘ra, samolyot bortida 79 nafar yo‘lovchi bo‘lgan. Hodisadan so‘ng mazkur samolyot parvozlardan vaqtincha chetlatilgan.
Moskvaga qaytish reysi uchun zaxiradagi samolyot ajratilgan.
Samolyotlar bilan bog‘liq so‘nggi paytlardagi boshqa hodisalar
25-dekabr kuni Boku-Grozniy marshruti bo‘yicha uchgan samolyot Qozog‘istonning Oqtov shahrida qulagan, oqibatda 38 nafar odam halok bo‘lgandi.
28-dekabr kuni Kanadaning Galifaks aeroportida samolyot qo‘nish chog‘ida yonib ketgani xabar qilingan. Yo‘lovchilarning so‘zlariga ko‘ra, samolyot shassisining g‘ildiraklaridan biri ishlamay qolgan. Galifaks aeroporti samolyot bortidagi barcha yo'lovchilar va ekipaj a'zolari evakuatsiya qilinganini xabar berdi.
29-dekabr, yakshanba kuni mahalliy vaqt bilan soat 9:07 da Jeju Air aviakompaniyasining Boeing 737-800 yo‘lovchi samolyoti Janubiy Koreyada halokatga uchradi. Tailandning Bangkok shahridan Janubiy Koreyaning Muan shahriga uchayotgan samolyot qo‘nish vaqtida uchish-qo‘nish yo‘lagidan chiqib ketgan va panjaraga urilgan, shundan so‘ng u ikki qismga bo‘lingan va yonib ketgan, 177 nafardan ortiq odam halok bo'lgan.
29-dekabr kuni Birlashgan Arab Amirliklarida Jazirah Aviation Club aviakompaniyasiga tegishli yengil motorli samolyot dengizga qulab tushdi. Ma’lum qilinishicha, aviahalokat oqibatida uchuvchi va hamrohi halok bo‘lgan.
Izoh (0)