Лос Анжелес аэропортида икки самолёт учиш-қўниш йўлагида тўқнашиб кетишига сал қолди. Ҳодиса видеоси NBC News томонидан эълон қилинди.
Телеканал маълумотларига кўра, бу ҳодиса 27 декабрь куни содир бўлган, ўшанда Кей Lime Аир (КЛМ) компаниясининг Embraer Э135 чартер самолёти Вашингтон университетининг эркаклар баскетбол жамоасини олиб кетаётган эди. Самолёт аэропортга қўниб, учиш-қўниш йўлаги бўйлаб ҳаракатланаётганда Атлантага тижорий рейс билан учаётган Delta Airlines лайнери билан тўқнашиб кетишига бир бахя қолди.
Маълум қилинишича, Embraer Э135 самолётига учиш-қўниш йўлагини кесиб ўтмаслик ҳақида кўрсатма берилган, бироқ у белгиланган жойда тўхтамаган. Шу сабабли авиадиспетчер “Стоп! Стоп!” деб бақиришга мажбур бўлган.
Ҳозирда АҚШ Федерал Авиация бошқармаси ҳодиса юзасидан тергов олиб бормоқда.
25 декабрь куни Боку-Грозний маршрути бўйича учган самолёт Қозоғистоннинг Оқтов шаҳрида қулаган, оқибатда 38 нафар одам ҳалок бўлганди.
28 декабрь куни Канаданинг Галифакс аэропортида самолёт қўниш чоғида ёниб кетгани хабар қилинган. Йўловчиларнинг сўзларига кўра, самолёт шассисининг ғилдиракларидан бири ишламай қолган. Галифакс аэропорти самолёт бортидаги барча йўловчилар ва экипаж аъзолари эвакуация қилинганини хабар берди.
29 декабрь, якшанба куни маҳаллий вақт билан соат 9:07 да Jeju Air авиакомпаниясининг Boeing 737-800 йўловчи самолёти Жанубий Кореяда ҳалокатга учради. Таиланднинг Бангкок шаҳридан Жанубий Кореянинг Муан шаҳрига учаётган самолёт қўниш вақтида учиш-қўниш йўлагидан чиқиб кетган ва панжарага урилган, шундан сўнг у икки қисмга бўлинган ва ёниб кетган, 177 нафардан ортиқ одам ҳалок бўлган.
29 декабрь куни Бирлашган Араб Амирликларида Jazirah Aviation Club авиакомпаниясига тегишли енгил моторли самолёт денгизга қулаб тушди. Маълум қилинишича, авиаҳалокат оқибатида учувчи ва ҳамроҳи ҳалок бўлган.
Изоҳ (0)