Қозоғистон президенти Қосим-Жўмарт Тўқаев Оқтовдаги авиаҳалокат бўйича йиғилиш ўтказди.
Унда Тўқаев Озарбайжоннинг Embraer 190 самолёти ҳалокатга учрагани ҳақида дезинформация ва провокациялар тарқалишига йўл қўймаслик муҳимлигини таъкидлади.
Мазкур йиғилишда Қозоғистон етакчиси бутун мамлакат бўйлаб ҳалокат муносабати билан авиация хавфсизлигини текширишни бошлаш лозимлигини қайд этди. У, шунингдек, ҳукумат комиссияси ва бош прокуратурага фалокатни ҳар томонлама текширишни таъминлашни топширди. Сиёсатчи ҳукуматга самолёт ҳалокатининг оқибатларини бартараф этишда мардлик ва маҳорат кўрсатганларни мукофотлашни буюрди.
25 декабрь куни AZAL компаниясига тегишли Embraer 190 йўловчи самолёти Боку—Грозний йўналиши бўйлаб учиб, Оқтов аэропортидан 3 километр узоқликда қулаган эди.
Самолёт бортида 67 киши, хусусан, 62 нафар йўловчи ва 5 нафар экипаж аъзоси бўлган. Улардан 38 нафари ҳалок бўлган, 29 нафари омон қолди. Экипажнинг иккала учувчиси ва стюардесса ҳалок бўлди.
Azerbaijan Airlines (AZAL) компанияси Қозоғистоннинг Оқтов шаҳри яқинида қулаган самолётнинг ҳалокатига “ташқи жисмоний ва техник таъсир” сабаб бўлганини маълум қилди.
“Озарбайжон фуқаро авиацияси давлат агентлиги билан келишилган ҳолда Россиянинг бир қатор шаҳарларига Бокудан парвозларни бекор қилиш тўғрисида қарор қабул қилди. Бунга Embraer 190 самолёти ҳалокати бўйича терговнинг дастлабки натижалари асос бўлди. Унга кўра Боку—Грозний рейсини амалга ошираётган, Оқтов шаҳри яқинида қулаган самолёт ҳалокатига жисмоний ва техник ташқи таъсир сабаб бўлгани аниқланди”, дейилади авиакомпания баёнотида.
Euronews телеканали Озарбайжон самолётининг ҳалокатига Россия ракетаси сабаб бўлганини хабар қилган. Reuters агентлиги эса мазкур самолётни Россиянинг “Панцир-С” мудофаа тизими қулатгани ҳақида мақола эълон қилган.
Россия авиацияси раҳбари берган баёнотида ҳалокатга Украина дронлари ва қуюқ туманни сабаб қилиб кўрсатган.
“AZAL самолёти об-ҳаво шароити (500 метр баландликда кўринишни ёмонлаштирган туман) ва “Украинанинг ҳужумлари” туфайли жорий этилган режа сабабли Грознийга қўна олмаган. Самолётни қўндиришга икки марта уринишдан сўнг, ҳаво кемаси командири, унга бошқа вариантлар таклиф қилинишига қарамай, Қозоғистонга учишга қарор қилган”, дейилади Дмитрий Ядров баёнотида.
Изоҳ (0)