Хитойда шифокорлар 15 ёшли Нини исмли қизнинг қорнидан 2 кило соч тўпламини олиб ташлади. Бу ҳақда South China Morning Post хабар берди.
Нини олти йил давомида ўз сочларини юлиб, ейишга ружу қўйган. Июль ойида у онаси билан бирга Хубей провинциясидаги Ухан болалар шифохонасига мурожаат қилган. Қиз ниҳоятда озғин бўлиб, бўйи 1,6 метр, вазни эса атиги 35 килограм эди. Шунингдек, Нини олти ойдан бери ҳайз кўрмагани аниқланган.
Онаси уни кучли қорин оғриғи сабаб шифохонага олиб келган. Бу оғриқ Нининг овқат ейишига тўсқинлик қилган ва ҳатто ҳушидан кетишига ҳам сал қолган. Шифокорлар унга ўткир камқонлик ташхисини қўйган. Онанинг сўзларига кўра, қиз 6 йил давомида ўз сочини еб келган.
Текширув жараёнида шифокорлар бемор ошқозонини деярли бутунлай эгаллаб олган, соч ва озиқ-овқат қолдиқларидан иборат соч тўпламини аниқлаган. Мутахассислар фикрича, айнан шу бир қатор касалликларга сабаб бўлган.
14 июль куни Нини операция қилинган ва соч тўплами олиб ташланган. Операция вақтида шифокорлар унинг қорни одатдагидан икки баравар катталашганини кўрган.
Трихофагия (соч еб қўйиш одати) билан оғриган беморларга одатда парҳез, психиатрия ва дори-дармонларни ўз ичига олган даволаш курсини ўтайди.
Биз беморларга витаминларга бой таомларни кўпроқ ейишни маслаҳат берамиз. Уларнинг нотўғри одатларини тузатиб, хулқ-атворини ўзгартиришга ёрдам берамиз. Шунингдек, соғлиғини яхшилаш учун дорилар буюрамиз, дейди Жинлинг шифохонаси шифокори Лю Фа.
Баъзан анъанавий Хитой табобати ва физиотерапия ҳам беморларнинг аломатларини енгиллаштириш учун қўлланилади. Операциядан беш кун ўтгач, Нини яна овқатлана бошлаган. У шифохонадан чиқарилган ва 5 август куни тиббий кўрикка қайтган. Шифокорлар унинг соғайиб кетаётганини айтган.
Миннатдорчилик сифатида Нини шикофорларга ширинликлардан ясалган гул олиб келган. Онаси эса қизининг аста-секин семириб бораётганини билдирган.
Агар болалар бир ойдан ортиқ вақт давомида соч ёки шиша каби ноозиқ-овқат нарсаларни ейишни тўхтата олмаса, ота-оналар трихофагия деб аталадиган касалликдан огоҳ бўлиши ва болани шифохонага олиб бориши керак, дейди исми ошкор этилмаган шифокор.
Изоҳ (0)