Озарбайжон президенти Илҳом Алиев Оқтовда қулаган Azerbaijan Airlines самолёти учувчилари омон қолмасликларини билганини айтди. Президент рафиқаси Меҳрибон Алиева билан уларнинг дафн маросимида қатнашди.
Алиев экипаж аъзоларини мукофотлаш тўғрисида фармон эълон қилишини таъкидлади. У учувчиларнинг ҳаракатларини, уларнинг профессионаллиги, фидойилигини юқори баҳолади.
Учувчилар ва бутун экипаж ҳақиқий қаҳрамонликни намойиш этди. Учувчилар бошқариб бўлмайдиган ҳолатда бўлган самолётни турли усуллар билан бошқариб, ҳам профессионаллик, ҳам қаҳрамонлик кўрсатди. Албатта, учувчилар тажрибали эди ва фавқулодда қўнишдан кейин омон қололмасликларини билишарди. Бироқ йўловчиларни қутқариш учун улар юқори даражадаги қаҳрамонлик кўрсатди ва айнан шу туфайли ҳалокатда тирик қолганлар бор.
Айнан шу туфайли фюзеляжнинг бир қисми ёнмади ва айнан шу туфайли бугун биз самолётни Россия уриб туширганини аниқ айта оламиз. Бу факт ва уни ҳеч ким инкор эта олмайди. Биз буни қасддан қилинган деб таъкидламаймиз, лекин бу амалга оширилган, деди Алиев.
♦ Озарбайжон президенти авиаҳалокат сабаблари ҳақида
Илҳом Алиев якуний версия қора қутилар очилгандан сўнг маълум бўлишини айтди. Аммо дастлабки тахминлар ҳам етарли даражада ва фактларга асосланганини билдирди.
“Фактлар шундан иборатки, Озарбайжон фуқаролик самолёти Россия ҳудудида, Грозний шаҳри яқинида ташқи таъсир оқибатида шикастланган ва деярли бошқарувни йўқотган. Шунингдек, бизнинг самолётимиз радиоэлектрон кураш воситалари ёрдамида бошқариб бўлмайдиган ҳолатга туширилганини ҳам биламиз. Бу самолётга етказилган биринчи зарар ҳисобланади”, деди у Озарбайжон телевидениесига берган интервьюсида таъкидлади.
♦ Россияга қўйилган талаблар
“Биз Россия томонига ўз талабларимизни аниқ баён қилдик. 27 декабрь куни бу талаблар уларга расман топширилди. Улар нимадан иборат? Биринчидан, Россия томони Озарбайжондан узр сўраши керак. Иккинчидан, улар ўз айбларини тан олиши лозим.
Учинчидан, улар айбдорларни жазолаши, жиноий жавобгарликка тортиши ва Озарбайжонга, жабрланган йўловчилар ва экипаж аъзоларига товон тўлаши керак — бу бизнинг шартларимиз. Улардан биринчиси кеча тақдим этилганди. Умид қиламанки, бошқа шартларимиз ҳам қабул қилинади”, деди Илҳом Алиев.
♦ Россия авиаҳалокат ишини яширишга уринган
Афсуски, дастлабки уч кун давомида Россиядан мантиқсиз версиялардан бошқа ҳеч нарсани эшитмадик. Бизни хафа қилгани ва ҳайратга солган жиҳатлардан бири шундаки, Россия расмий тузилмалари қандайдир газ баллонининг портлаши ҳақида тахминларни илгари суришди. Яъни бу Россия томони масалани бостиришни хоҳлаётганини очиқ кўрсатди ва бу, албатта, ҳеч кимга шараф келтирмайди, деди сиёсатчи.
♦ Путин Алиевдан узр сўради
29 декабрь куни Россия президенти Владимир Путин Озарбайжонлик ҳамкасбидан авиаҳалокат “Россия ҳаво ҳудудида юз бергани учун” узр сўради. У қурбонларнинг оиласига ҳамдардлик, омон қолганларга тезроқ соғайиб кетишни тилади.
Кремлнинг таъкидлашича, Озарбайжон самолёти Грозний аэропортига бир неча бор қўнишга уринган. “Ўша вақтда Грозний, Моздок ва Владикавказ Украина жанговар дронлари томонидан ҳужумга учраган ва Россия ҳаво ҳужумидан мудофаа тизимлари бу ҳужумларни қайтарган”, дейилади баёнотда.
♦ Қозоғистондаги авиаҳалокат
Бокудан Грознийга J28243 рейсини амалга ошираётган Embraer 190 самолёти 25 декабрь куни эрталаб Қозоғистоннинг Оқтов шаҳри яқинида ҳалокатга учради. Диспетчерлар Грозний ва Махачқалъада қўнишни рад этганидан кейин лайнер мажбурий қўнишни амалга оширишга уринди. Оқтов аэропортига бир неча километр қолганда у қулаб тушди, портлаб, ёниб кетди.
Бурун қисми тўлиқ ёнган, дум қисмида эса омон қолганлар бўлган. Камида 29 нафар тирик қолган йўловчи айнан шу қисмда бўлган. Улар касалхонага олиб кетилган. Azerbaijan Airlines самолёти қулаши оқибатида 38 киши ҳалок бўлган. Қулаган самолёт кўздан кечирилганда тешиклар аниқланган. Шунга асосланиб, айрим манбалар самолётни Чеченистонга дрон ҳужумини қайтарган ҳаво ҳужумидан мудофаа тизими ўққа тутган бўлиши мумкинлигини ёзган.
Изоҳ (0)