Россия Япон денгизида ҳарбий-денгиз машқларини амалга оширади. Бу ҳақда Россия Мудофаа вазирлиги тарқатган хабарга асосланиб, The Moscow Times нашри хабар берди.
Манбада айтилишича, Россиянинг денгиз машқлари Жанубий Корея ва Японияга яқин сувларда амалга оширилади. Ўнлаб кемалар иштирокидаги манёврлар 10 кун давом этади.
“Денгизчилар сувости кемаларига қарши операцияларни, денгизда кема отрядларини ҳимоя қилишни, шартли душманга тегишли кемалар гуруҳига биргаликда ракета зарбаларини беришни, дрон ва учувчисиз ҳужумларни қайтариш бўйича машғулотларни, амалий машғулотлар ва жанговар машқларни бажарадилар”, — дейилган Россия Мудофаа вазирлиги хабарида.
Россия Мудофаа вазирлиги томонидан эълон қилинган видеода Россия Тинч океани флотининг тезкор базаси бўлган Узоқ Шарқдаги Владивосток шаҳридан бир неча ҳарбий кема ва сувости кемаси денгизга сузиб кетаётгани акс этган.
Мудофаа вазирлиги маълумотларига кўра, ҳарбий-денгиз кучларининг машғулотлари Тинч океани, Япон денгизи ва Охота денгизида “40 та кема, корветлар ва ёрдамчи кемалар”, шунингдек, 20 га яқин самолёт ва вертолётлар иштирокида ўтказилади.
Россия мунтазам равишда Узоқ Шарқ соҳиллари яқинидаги Тинч океани сувларида ҳарбий-денгиз кучларининг намойиши сифатида машғулотлар ўтказади. Ғарб мамлакатлари бу машқларни АҚШ иттифоқчиларининг хавфсизлигига таҳдид сифатида мунтазам қоралаб келади.
Изоҳ (0)