Қозоғистонда ҳалокатга учраган Azerbaijan Airlines (AZAL) авиакомпанияси самолёти командирига Грознийга қўнишга уринишлардан сўнг бошқа аэропортлар таклиф этилган, аммо у Оқтовга учишни маъқул кўрган. Бу ҳақда Росавиация раҳбари Дмитрий Ядров маълум қилди.
Ядровнинг таъкидлашича, AZAL самолёти об-ҳаво шароити (500 метр баландликда кўринишни ёмонлаштирган туман) ва “Украинанинг ҳужумлари” туфайли жорий этилган режа сабабли Грознийга қўна олмаган. Самолётни қўндиришга икки марта уринишдан сўнг, ҳаво кемаси командири, унга бошқа вариантлар таклиф қилинишига қарамай, Қозоғистонга учишга қарор қилган.
Ядров AZAL самолётига қаерда қўниш таклиф қилинганига аниқлик киритмади.
“Биргаликда тергов қилиниши лозим бўлган турли ҳолатлар мавжуд. Биз ҳамкасбларимиз билан ҳамкорликда бу ишга тўла тайёрмиз”, дея таъкидлади Росавиация раҳбари.
Аввалроқ Reuters нашри мазкур самолёт Россия ҳаво ҳужумидан мудофаа тизими томонидан уриб туширилгани ҳақида хабар берган эди.
Манбаларга кўра, дастлабки маълумотлар самолёт Россиянинг “Панцирь-С” зенит-ракета тизими томонидан ҳужумга учраган. Лайнер алоқаси эса Грозний яқинида радиоэлектрон кураш тизимлари томонидан “фалаж қилинган”.
“Ҳеч ким буни атайлаб қилинган деб таъкидламайди. Бироқ аниқланган фактларни ҳисобга олган ҳолда, Боку Россия томони Озарбайжон самолётини уриб туширганини тан олишини кутмоқда”, деди манба.
Озарбайжон депутати ҳам авиаҳалокатга Россия айбдорлигини айтмоқда
“Самолёт Россия ҳудудида, Грозний осмонида ўққа тутилган. Буни инкор этиб бўлмайди... Буни содир этганлар жиноий жавобгарликка тортилиши, товон пули тўланиши керак”, деди депутат Расим Мусабеков.
Депутатнинг таъкидлашича, Россияда кимдир “изларни яширишга” уринмоқда, аммо агар узр сўралмаса, айбдорлар жавобгарликка тортилмаса ва товон пули тўланмаса, Боку ва Москва ўртасидаги муносабатлар “бошқа даражага ўтади”.
Озарбайжон самолётининг ҳалокатига Россия ракетаси сабаб бўлган — Euronews
Euronews ҳам Озарбайжон ҳукуматидаги манбаларга асосланиб, Россия ракетаси Azerbaijan Airlines самолётининг ҳалокатга учрашига сабаб бўлгани ҳақида хабар берган. Дастлабки маълумотларига кўра, Грозний устидан учиб бораётган вақтда самолётга ҳаво мудофаа тизими билан зарба берилган. Зенит ракета ҳаводаги самолёт ёнида портлаб, металл парчалар экипаж ва йўловчиларни жароҳатлаган.
Бироқ учувчиларнинг фавқулодда қўниш ҳақидаги сўровларига қарамай, Россиянинг бирорта аэропортига қўнишга рухсат бермаган. Шундан сўнг экипажга Каспий денгизи орқали Қозоғистоннинг Оқтов шаҳри томон учиш буюрилган. Россия армияси томонидан қўлланилган радиотўлқинли қуроллар самолётнинг GPS навигация тизимига зарар етказгани айтилмоқда.
Боку—Грозний рейсининг вақти Украина армияси томонидан Чеченистонга дрон зарбалари берилган вақтга тўғри келди. Тармоқларда пайдо бўлган видео J2-8243 рейси Грознийга учаётган вақти Чеченистонда олинган бўлиб, унда Украина дрони “Панцирь-С” тизими ёрдами билан уриб туширилиши акс этган.
Қулаган самолётда тешиклар аниқланган
Қулаган самолёт кўздан кечирилганда тешиклар аниқланган. Шунга асосланиб, айрим манбалар самолётни Чеченистонга дрон ҳужумини қайтарган ҳаво ҳужумидан мудофаа тизими ўққа тутган бўлиши мумкинлигини ёзган.
Изоҳ (0)