Россия президенти Владимир Путин Қозоғистон президенти Қосим-Жўмарт Тўқаев билан телефон орқали суҳбат қилди. Мулоқот Москва ташаббуси билан амалга оширилди, деб хабар бермоқда Кремль матбуот хизмати.
“Давлат раҳбарлари 25 декабрь куни Оқтов шаҳри яқинида Озарбайжон ҳаво йўллари авиакомпанияси самолётининг ҳалокати муносабати билан қурбонлар оиласига таъзия билдиришди. Ушбу самолётда Россия ва Қозоғистон фуқаролари ҳам бўлган”, дейилади хабарда.
Барча тафсилотларни текшириш билан шуғулланаётган Қозоғистон ҳукумат комиссияси самолёт ҳалокати жойида топилган “қора қути”ни ўқиб чиқиш учун Россия, Озарбайжон ва Бразилиядан мутахассисларни жалб этади.
“Қозоғистон ҳудудида амалга ошириладиган бу ишлар холисона ва шаффоф тарзда олиб борилади”, дейилади хабарда.
Шунингдек, хабарда таъкидланишича, икки давлат раҳбарлари Озарбайжон самолёти билан боғлиқ фожиали ҳодисанинг барча ҳолатларини текшириш масалалари бўйича ҳам, Россия—Қозоғистон ҳамкорлигини янада ривожлантиришнинг долзарб мавзулари бўйича ҳам доимий алоқада бўлишади.
Қозоғистондаги авиаҳалокат
Бокудан Грознийга J28243 рейсини амалга ошираётган Embraer 190 самолёти 25 декабрь куни эрталаб Қозоғистоннинг Оқтов шаҳри яқинида ҳалокатга учради. Диспетчерлар Грозний ва Махачқалъада қўнишни рад этганидан кейин лайнер мажбурий қўнишни амалга оширишга уринди. Оқтов аэропортига бир неча километр қолганда у қулаб тушди, портлаб, ёниб кетди.
Бурун қисми тўлиқ ёнган, дум қисмида эса омон қолганлар бўлган. Камида 29 нафар тирик қолган йўловчи айнан шу қисмда бўлган. Улар касалхонага олиб келинган. Azerbaijan Airlines самолёти қулаши оқибатида 38 киши ҳалок бўлган. Самолёт бортида жами 67 киши — 62 йўловчи ва беш экипаж аъзоси бўлган.
Изоҳ (0)