Жанубий Кореяда Jeju Air авикомпанияси йўловчи самолёти ҳалокатга учради. Бу ҳақда Yonhap агентлиги хабар берди.
Маълум қилинишича, воқеа 29 декабрь куни соат 09:07 да (Тошкент вақти билан 05:07 да) Муан шаҳри аэропортида юз берган. Шассиси очилмаган самолёт учиш-қўниш йўлагидан чиқиб кетиб, тўсиққа урилган ва ёниб кетган.
Бангкокдан учиб келган Boeing 737 самолёти бортида 173 нафар Жанубий Корея ва 2 нафар Таиланд фуқароси бўлган. Айни пайтда камида 28 киши ҳалок бўлган. Уларнинг барчаси самолётнинг дум қисмида бўлган.
Ҳодиса жойида қутқарув операцияси олиб борилмоқда. Расмийлар ҳалокатнинг сабабларини аниқлаш учун тергов бошлади.
Бундан бир неча кун аввал Бокудан Грознийга учаётган Embraer 190 самолёти Қозоғистонда қулаб тушганди. Azerbaijan Airlines самолёти қулаши оқибатида 38 киши ҳалок бўлган. Самолёт бортида жами 67 киши — 62 йўловчи ва беш экипаж аъзоси бўлган. Камида 29 нафар йўловчи тирик қолган. Улар самолётнинг дум қисмида бўлган.
Azerbaijan Airlines компанияси Қозоғистоннинг Оқтов шаҳри яқинида қулаган самолётнинг ҳалокатига “ташқи жисмоний ва техник таъсир” сабаб бўлганини маълум қилди.
Euronews телеканали Озарбайжон самолётининг ҳалокатига Россия ракетаси сабаб бўлганини хабар қилди. Reuters агентлиги эса мазкур самолётни Россиянинг “Панцир-С” мудофаа тизими қулатгани ҳақида мақола эълон қилди. Россия авиацияси раҳбари берган баёнотида ҳалокатга Украина дронлари ва қуюқ туманни сабаб қилиб кўрсатган.
28 декабрь куни Россия президенти Владимир Путин Озарбайжон президенти Илҳом Алиев билан суҳбат чоғида Azerbaijan Airlines самолёти билан содир бўлган фожиали воқеа учун узр сўради.
Ҳолат юзасидан “Ҳаво транспорти ҳаракати ва ҳаракат хавфсизлиги қоидаларини бузиш” моддаси бўйича жиноий иш қўзғатилган.
Изоҳ (0)