Озарбайжон президенти Илҳом Алиев Оқтовда ҳалокатга учраган Embraer 190 самолёти юзасидан баёнот бериб, Россия авиаҳалокат ишини яширишга уринганини айтди. Президент ҳалокат юзасидан Россияга талаблар қўйди.
Озарбайжон авиаҳалокатни текшириш бўйича Россиянинг давлатлараро қўмитаси таклифини рад этди. Алиев бунинг сабабини қуйидагича изоҳлади.
“Россия томони бизга бу ишни Давлатлараро авиация қўмитаси томонидан текширишни расман таклиф қилди. Биз бундан қатъиян воз кечдик. Сабаби аниқ, чунки бу институт асосан россиялик амалдорлардан иборат бўлиб, унинг тепасида россиялик фуқаролар туриши сир эмас.
Бу ерда объективлик омиллари тўлиқ қаноатлантирилмаслиги мумкин. Агар биз ҳалокатдан сўнг дарҳол Россия томонидан кўрилган адолатли ва адекват қадамларни кўрганимизда, эҳтимол, эътироз билдирмаган бўлардик. Аммо бу масалани яширишга аниқ уринишлар борлигини кўрдик. Самолётга тушган “осколка”ларнинг йўловчилар ва экипаж аъзоларига етказган жароҳатлари аниқ. Буни қандайдир қушларга ёки газ баллонининг портлашига йўйиш ҳам аҳмоқлик, ҳам инсофсизлик”, деди Озарбайжон президенти.
Россияга қўйилган талаблар
“Биз Россия томонига ўз талабларимизни аниқ баён қилдик. 27 декабрь куни бу талаблар уларга расман топширилди. Улар нимадан иборат? Биринчидан, Россия томони Озарбайжондан узр сўраши керак. Иккинчидан, улар ўз айбларини тан олиши лозим.
Учинчидан, улар айбдорларни жазолаши, жиноий жавобгарликка тортиши ва Озарбайжонга, жабрланган йўловчилар ва экипаж аъзоларига товон тўлаши керак — бу бизнинг шартларимиз. Улардан биринчиси кеча тақдим этилганди. Умид қиламанки, бошқа шартларимиз ҳам қабул қилинади”, деди Илҳом Алиев.
У самолёт атайлаб уриб туширилмагани, айбни тан олиш, Озарбайжондан ўз вақтида кечирим сўраш ва буни жамоатчиликка етказиш амалга оширилиши керак бўлган чоралар эканини айтди.
“Афсуски, дастлабки уч кун давомида Россиядан мантиқсиз версиялардан бошқа ҳеч нарсани эшитмадик. Бизни хафа қилгани ва ҳайратга солган жиҳатлардан бири шундаки, Россия расмий тузилмалари қандайдир газ баллонининг портлаши ҳақида тахминларни илгари суришди. Яъни бу Россия томони масалани бостиришни хоҳлаётганини очиқ кўрсатди ва бу, албатта, ҳеч кимга шараф келтирмайди” деди сиёсатчи.
Путин Алиевдан узр сўради
29 декабрь куни Россия президенти Владимир Путин Озарбайжон раҳбари Илҳом Алиев билан суҳбат чоғида AZAL самолёти билан содир бўлган фожиали воқеа учун узр сўради.
“Владимир Путин фожиали ҳодиса Россия ҳаво ҳудудида юз бергани учун узр сўради ва қурбонларнинг оила аъзоларига яна бир бор чуқур ҳамда самимий ҳамдардлик билдирди, жароҳатланганларнинг тезроқ соғайиб кетишини тилади”, дейилади Кремль хабарида.
Кремлнинг таъкидлашича, Озарбайжон самолёти Грозний аэропортига бир неча бор қўнишга уринган.
“Ўша вақтда Грозний, Моздок ва Владикавказ Украина жанговар дронлари томонидан ҳужумга учраган ва Россия ҳаво ҳужумидан мудофаа тизимлари бу ҳужумларни қайтарган”, дейилади баёнотда.
Қозоғистондаги авиаҳалокат
Бокудан Грознийга J28243 рейсини амалга ошираётган Embraer 190 самолёти 25 декабрь куни эрталаб Қозоғистоннинг Оқтов шаҳри яқинида ҳалокатга учради. Диспетчерлар Грозний ва Махачқалъада қўнишни рад этганидан кейин лайнер мажбурий қўнишни амалга оширишга уринди. Оқтов аэропортига бир неча километр қолганда у қулаб тушди, портлаб, ёниб кетди.
Бурун қисми тўлиқ ёнган, дум қисмида эса омон қолганлар бўлган. Камида 29 нафар тирик қолган йўловчи айнан шу қисмда бўлган. Улар касалхонага олиб кетилган. Azerbaijan Airlines самолёти қулаши оқибатида 38 киши ҳалок бўлган. Қулаган самолёт кўздан кечирилганда тешиклар аниқланган. Шунга асосланиб, айрим манбалар самолётни Чеченистонга дрон ҳужумини қайтарган ҳаво ҳужумидан мудофаа тизими ўққа тутган бўлиши мумкинлигини ёзган.
Изоҳ (0)