CNN медиа-компанияси ўзининг 1 октябрь куни “cnn.com” янгиликлар сайтида материалларга қисман пулли кириш жорий этилганини эълон қилди. Ойлик тўлов 3,99 долларни ташкил этади.
“Бугундан бошлаб биз Қўшма Штатлардаги фойдаланувчилардан cnn.com сайтидаги контентга чексиз кириш учун кичик ойлик тўловни тўлашни сўраймиз”, деб ёзади CNN рақамли маҳсулотлар ва хизматлар бўйича ижрочи вице-президенти Алекс Маккаллум.
Унинг тушунтиришича, тўловни жорий этиш ойига атига бир нечта мақола ўқийдиган CNN веб-сайтининг ўрта статистикали фойдаланувчиларига тааллуқли эмас.
“Фойдаланувчилар маълум миқдордаги мақолаларни ўқиб чиққанидан сўнг, сайтни ўқишни давом эттириш учун тўлов амалга оширишлари сўралади”, деди Маккаллум.
Унинг қўшимча қилишича, cnn.com контентидан чексиз фойдаланишдан ташқари, пулли обуначилар эксклюзив сайловларнинг бориши, оригинал ҳужжатли фильмлар, энг ёрқин журналистик материалларнинг кундалик танлови ва камроқ рекламалардан баҳраманд бўлишади.
Компания сайт материалларининг қанча қисми бепул бўлишини очиқламаган.
CNN’нинг бир қатор контентларига обунасиз тўлиқ кириш мумкинлигича қолмоқда, жумладан, CNN бош саҳифаси, жонли эфирдаги янгиликлар, алоҳида видеосаҳифалар ва ҳомийлик қилинган мақолалар.
Дунёдаги энг йирик халқаро мултимедиа янгиликлари провайдери Thomson Reuters октябрь ойи бошида ўз веб-сайти ва иловасида тўлов тизимини ишга туширишини эълон қилган. Ахборот агентлигининг хабар беришича, обуна бутун дунё бўйлаб ҳафталик 1 доллар эвазига мавжуд бўлади.
“Ушбу янги обуна режаси Reuters’га ўзининг мукофотга сазовор бўлган қамров доирасини арзон нархларда кенгайтиришини таъминлайди, шу билан бирга, ҳисобот ва обуна маҳсулотларига қўшимча сармоя киритишга имкон беради”, дейди Reuters президенти Пол Баскоберт.
Аввалроқ “Daryo.uz” сайтида ҳам айрим мақолаларни ўқиш пулли бўлганини хабар қилган эдик.
Чунки профессионал журналистлар жамоасини тузиш, сифатли контент яратиш, ўқувчилар талабига муносиб жавоб бериш, албатта, ўзига хос маблағни талаб этади.
Изоҳ (0)