Жанг санъати устаси ва таниқли хитойлик актёр Жеки Чан Шанхай Лин Шан касалхонасига олиб кетилди. Бу ҳақда 25 декабрь, душанба куни Meta MMA портали хабар берди.
Тасдиқланмаган маълумотларга кўра, 69 ёшли актёрнинг аҳволи оғир, шифокорлар унга барча зарур ёрдамни кўрсатмоқда. ОАВ таъкидлаганидек, Жеки Чаннинг касалхонага ётқизилгани ҳақидаги барча хабарлар Хитой ижтимоий тармоқларидан фаол равишда ўчирилмоқда. Бундан ташқари, ушбу маълумотни баҳам кўрган фойдаланувчиларнинг аккаунтлари блокланяпти, деб ёзади Meta MMA.
Ҳозирда бу ҳақда расмий маълумот, шунингдек, актёрнинг қариндошлари ёки яқинларидан расмий изоҳ йўқ.
Аввалроқ Sony Pictures компанияси “Каратэ болакай-2” фильмининг актёрлар таркибини эълон қилган эди. Фильмдаги асосий роллардан бирини картинанинг биринчи қисмида бош ролни ижро этган Жеки Чан ўйнаши керак эди.
69 ёшли Жеки Чан кинодаги фаолиятини каскадёр сифатида бошлаган, баъзида камеоларда ва кичик ролларда ҳам суратга тушган. Жеки Чанга муваффақият келтирган фильм 1978 йилда суратга олинган “Бургут соясидаги илон” комедияси бўлганди.
Изоҳ (0)