Германия Ҳиндистон билан Украина учун воситачилар орқали бир неча юз снаряд сотиб олишни муҳокама қилмоқда. Бу ҳақда Spiegel манбаларга таяниб ёзди.
Музокаралар парда ортида кечмоқда, чунки Нью-Деҳли Москва билан муносабатларни бузмоқчи эмас. Spiegel’га кўра, араб давлатлари билан ҳам шундай битимлар тузилиши мумкин. Мутахассисларнинг фикрича, Болқон ва бир қатор Африка мамлакатларида ҳам зарур ўқ-дориларни ишлаб чиқариш имконияти мавжуд.
Немис разведка хизматлари Украинанинг снарядлар захираси июнь ойигача тугаши мумкинлигидан хавотирда. 24 февраль куни Украина ташқи ишлар вазири Дмитрий Кулеба Украинада ўқ-дориларнинг катта тақчиллиги кузатилаётганини айтган.
Мюнхен хавфсизлик конференциясида Чехия президенти Пётр Павел Прага Украина учун Европа Иттифоқига кирмаган мамлакатлардан 800 мингга яқин артиллерия ўқ-дориларини, хусусан, 155 мм ва 122 мм калибрли снарядлар манбаларини топганини айтган. Европа Иттифоқи ҳозирда ўқ-дорилар сотиб олиш учун зудлик билан 1,5 миллиард доллар зарурлигини маълум қилган эди.
Изоҳ (0)