Чеченистон раҳбари Рамзан Қодировнинг соғлиғида жиддий муаммолар бор. Унга буйрак трансплантацияси муваффақиятсиз амалга оширилди. Бу ҳақда россиялик мухолифатчи ва Давлат думаси собиқ депутати Геннадий Гудков Чеченистондаги юқори мартабали манбаларга таяниб хабар берди.
Манбаларга кўра, Қодировнинг муаммолари шу қадар жиддий бўлганки, у буйрак трансплантациясини талаб қилган. Операция муваффақиятсиз тугаган ва буйрак “рад этишни” бошлаган.
“Мен таниқли чеченларга қўнғироқ қилдим ва сўрадим: Унинг ҳақиқатан ҳам соғлиғи ёмонми? Уларнинг маълумотларига кўра, унинг буйраклари билан боғлиқ муаммолари бор. Ҳатто операция, трансплантация ҳам бўлиб ўтган, лекин у муваффақиятсиз кечган, гўёки қандайдир йиринглаш бошланган. Унинг соғлиғи жуда ёмон”, — деди Гудков.
Қодировнинг соғлиғи кескин ёмонлашгани ҳақидаги миш-мишлар 2023 йилнинг баҳорида пайдо бўлганди. Бунга Чеченистон раҳбарининг ўзгарган қиёфаси сабаб бўлган. Жумладан, у жуда кўп вазн олган, юзлари шишган ва носоғлом кўринишга эга бўлган. Шундан сўнг буйрак билан боғлиқ муаммолар ҳақидаги версиялар пайдо бўлган. Муаммолар заҳарланиш натижасида юзага келгани ҳақида миш-мишлар тарқалган.
Манбаларнинг таъкидлашича, сўнгги пайтларда Чеченистон раҳбари кўп вақтини хорижда ўтказиб, республикани бошқаришдан узоқлашмоқда. Ўз навбатида, Рамзан Қодиров бедаво дардга чалингани ҳақидаги миш-мишларни рад этиб келади.
У аввалгидек спорт билан шуғулланиши, тоғларга чиқиши, Чеченистонни ривожлантиришдаги муҳим масалаларни муҳокама қилиш билан шуғулланаётганини таъкидлаганди. Бундан ташқари, у қўлида тиббий асбоб эмас, балки электрон тасбеҳ борлигини тушунтирган.
Изоҳ (0)