CNN media-kompaniyasi o‘zining 1-oktyabr kuni cnn.com yangiliklar saytida materiallarga qisman pulli kirish joriy etilganini e’lon qildi. Oylik to‘lov 3,99 dollarni tashkil etadi.
“Bugundan boshlab biz Qo‘shma Shtatlardagi foydalanuvchilardan cnn.com saytidagi kontentga cheksiz kirish uchun kichik oylik to‘lovni to‘lashni so‘raymiz”, deb yozadi CNN raqamli mahsulotlar va xizmatlar bo‘yicha ijrochi vitse-prezidenti Aleks Makkallum.
Uning tushuntirishicha, to‘lovni joriy etish oyiga atiga bir nechta maqola o‘qiydigan CNN veb-saytining o‘rta statistikali foydalanuvchilariga taalluqli emas.
“Foydalanuvchilar ma’lum miqdordagi maqolalarni o‘qib chiqqanidan so‘ng, saytni o‘qishni davom ettirish uchun to‘lov amalga oshirishlari so‘raladi”, dedi Makkallum.
Uning qo‘shimcha qilishicha, cnn.com kontentidan cheksiz foydalanishdan tashqari, pulli obunachilar eksklyuziv saylovlarning borishi, original hujjatli filmlar, eng yorqin jurnalistik materiallarning kundalik tanlovi va kamroq reklamalardan bahramand bo‘lishadi.
Kompaniya sayt materiallarining qancha qismi bepul bo‘lishini ochiqlamagan.
CNN’ning bir qator kontentlariga obunasiz to‘liq kirish mumkinligicha qolmoqda, jumladan, CNN bosh sahifasi, jonli efirdagi yangiliklar, alohida videosahifalar va homiylik qilingan maqolalar.
Dunyodagi eng yirik xalqaro multimedia yangiliklari provayderi Thomson Reuters oktyabr oyi boshida o‘z veb-sayti va ilovasida to‘lov tizimini ishga tushirishini e’lon qilgan. Axborot agentligining xabar berishicha, obuna butun dunyo bo‘ylab haftalik 1 dollar evaziga mavjud bo‘ladi.
“Ushbu yangi obuna rejasi Reuters’ga o‘zining mukofotga sazovor bo‘lgan qamrov doirasini arzon narxlarda kengaytirishini ta’minlaydi, shu bilan birga, hisobot va obuna mahsulotlariga qo‘shimcha sarmoya kiritishga imkon beradi”, deydi Reuters prezidenti Pol Baskobert.
Avvalroq “Daryo.uz” saytida ham ayrim maqolalarni o‘qish pulli bo‘lganini xabar qilgan edik.
Chunki professional jurnalistlar jamoasini tuzish, sifatli kontent yaratish, o‘quvchilar talabiga munosib javob berish, albatta, o‘ziga xos mablag‘ni talab etadi.
Izoh (0)